ბათუმის მოვლენებზე აჭარის პოლიციის ყოფილმა უფროსმა მისცა ჩვენება

ბათუმის 11-12 მარტის მოვლენების ორგანიზებისთვის დაკავებული პირების პროცესი ბათუმის საქალაქო სასამართლოში აჭარის საპატრულო პოლიციის ყოფილი უფროსის კახა ბუხრაძის დაკითხვით განახლდა.

სწორედ ბუხრაძის გადადგომა იყო აქციის მონაწილეების ერთ-ერთი მთავარი მოთხოვნა.

კახა ბუხრაძემ დეტალურად გაიხსენა მერაბ ღოღობერიძესთან ურთიერთობა და განმარტა, რომ ღოღობერიძემ არაერთი თხოვნით მიმართა, რომელიც უკანონო ქმედების განხორციელებას გულისხმობდა. ბუხრაძე ამბობს, რომ ეს თხოვნები მან არ შეასრულა, რის შემდეგაც ბრალდებული აქციებითა და კორუფციაში მხილებით დაემუქარა.

"მერაბ ღოღობერიძეს ვიცნობ, ირაკლი ჩხვირკიას არა, მასთან ურთიერთობა არ მქონია. 2017 წლის 3 იანვარს როტაციის პრინციპით აჭარის პოლიციის მთავარი სამმართველოს ხელმძღვანელად დავინიშნე. მერაბ ღოღობერიძე კოლეგებმა გამაცნეს, როგორც არასამთავრობო ორგანიზაციის წევრი, მეგობრული შეხვედრა იყო. მერაბი შეხვედრაზე მთხოვდა, რომ აჭარელი პატრულ - ინსპექტორების დამოკიდებულება გამეთვალისწინებინა. ასევე მითხრა, რომ მას მართვის მოწმობა არ ჰონდა და ასე ვიმოძრავებო. მეთქი - არაკანონიერად არ მოხდება. ცინიკური საუბარი ჰქონდა. თქვა, რომ თუ მსგავს რაღაცეებს არ გავითვალისწინებდი კორუფციაში დამადანაშაულებდა. ამის შემდეგ ღიმილით შევხდი ამ საკითხს. უკანონო მოთხოვნებს არ ვასრულებ. ამის შემდეგ მასთან კომუნიკაცია რამდენჯერმე მქონდა. ვაიბერში რამდენიმე ტრაილერის პარკის ე.წ ჩეკი გამომიგზავნა და მთხოვა, რომ ტრაილერი გამეტარებინა. ამაზე უარი ვუთხარი და იმ საღამოდან სოციალურ ქსელში უაზრო ბრალდებები დაიწყო. განაცხადა, რომ მე ვიყავი კორუმპირებული, ადგილობრივ მოსახლეობას ცუდად ვექცეოდი თურმე. ჩაატარა აქცია, სადაც დაახლოებით სამი-ოთხი ტაქსის მძღოლი ჰყავდა მოყვანილი. სრული პასუხისმგებლობით ვამბობ, პლაზას მიმდებარედ მერაბი დადიოდა და ეუბნებოდა მოსახლეობას თითქოს მე გორელი ჩამოსული მათ თათრებს ვეძახდი, დადიოდა და საზოგადოებას მტრულად განაწყობდა ჩემს მიმართ. აჭარლებს ძალიან დიდი პატივს ვცემ. მსგავსი განცხადებები არ ყოფილა",- განაცხადა კახა ბუხრაძემ.

მისივე თქმით, აქციის ღამეს თვითონ თბილისში იმყოფებოდა. "დარწმუნებული ვარ, რომ ყველაფერი მერაბის ორგანიზებული იყო", - დასძინა ბუხრაძემ.

ირაკლი ჩხვირკიასა და მერაბ ღოღობერიძეს გამოძიება ბათუმის 11-12 მარტის აქციის ორგანიზებას ედავება.

ბათუმში ვითარება 11 მარტს საღამოს ჭავჭავაძის ქუჩაზე მომხდარი ინციდენტისას დაიძაბა. პოლიციამ 2 მოქალაქე მას შემდეგ დააკავა, რაც პატრულის თანამშრომელმა ერთ-ერთი მათგანი დააჯარიმა, რასაც იქ მყოფ მოქალაქეებსა და პოლიციელებს შორის დაპირისპირება მოჰყვა. მოგვიანებით, აქციამ აჭარის შს სამმართველოსთან გადაინაცვლა, სადაც პოლიციასა და აქციის მონაწილეებს შორის დაპირისპირება რამდენჯერმე მოხდა. აქციის მონაწილეები პოლიციის ეზოში შეჭრას ცდილობდნენ, რის შემდეგაც სპეცდანიშნულების რაზმმა ცრემლსადენი გაზი გამოიყენა.