გახარია 15 წლის მოზარდის დაჭრაზე: უახლოეს პერიოდში დამნაშავე პირებს დავაკავებთ

შინაგან საქმეთა მინისტრი გიორგი გახარია პარლამენტში ადამიანის უფლებათა დაცვის, იურიდიულ საკითხთა, თავდაცვისა და საპროცედურო საკითხთა გაერთიანებული კომიტეტის სხდომაზე დეპუტატების შეკითხვებს პასუხობს.

გახარიამ კომენტარი გააკეთა თავისუფლების მეტროსთან 15 წლის მოზარდის დაჭრის შესახებ.

"შემთხვევის მოწმეები გამოიკითხნენ. ჩვენთვის რაც ყველაზე მნიშვნელოვანი იყო, ვიცით რომ დღეს მდგომარეობა მძიმეა, მაგრამ სტაბილური. იმედია, რომ დღის ბოლომდე ახალგაზრდის მდგომარეობა იქნება დამაკმაყოფილებელი. მიმდინარეობს აქტიური საგამოძიებო პროცედურები და ვფიქრობ, რომ უახლოეს პერიოდში ამ დანაშაულში დამნაშავე პირებსაც დავაკავებთ", - თქვა გიორგი გახარიამ.

თბილისში, რუსთაველის გამზირის მიმდებარე ტერიტორიაზე მოზარდი გუშინ დაჭრეს. მას ცივი იარაღით გულ-მკერდის არეში 4 ჭრილობა მიაყენეს. მომხდარზე გამოძიება სისხლის სამართლის კოდექსის 19-108-ე მუხლით, განზრახ მკვლელობით დაიწყო.

პრემიერმინისტრი უკვე მესამედ, ამჯერადაც განახლებული შემადგენლობით, პარლამენტის წინაშე დღეს წარსდგება. უმრავლესობასა და საპარლამენტო ოპოზიციასთან შესახვედრად პრემიერმინისტრი პარლამენტში დღის მეორე ნახევარში მივა, მანამდე კი, კაბინეტის წევრები დეპუტატების კითხვებს, დილიდან კომიტეტის ფორმატში უპასუხებენ. მმართველი გუნდის წევრებს შეკითხვები მზად აქვთ, თუმცა უკვე იციან, რომ მთავრობის განახლებულ შემადგენლობას მხარს დაუჭერენ. მთავრობისა და სამთავრობო პროგრამისთვის ნდობის გამოცხადების საკითხი რიგგარეშე სესიაზე ხვალ გავა. 

7 დეკემბერს მთავრობის სტრუქტურული ცვლილებების პროექტი პარლამენტმა მესამე მოსმენით მიიღო.