„ჩემმა დაცვის ქვეშ მყოფმა ცნო თავი დამნაშავედ წაყენებულ ბრალდებაში და უდავოდ მიიჩნია მტკიცებულებები“ – ადვოკატები 4 ოქტომბრის საქმეზე ბრალდებულების ნაწილის მიერ დანაშაულის აღიარებას ადასტურებენ

ადვოკატები 4 ოქტომბრის საქმეზე ბრალდებულების ნაწილის მიერ დანაშაულის აღიარებას ადასტურებენ. „ქრონიკასთან“ სატელეფონო საუბარში ისინი აღნიშნავენ, რომ მათი დაცვის ქვეშ მყოფებმა თავი დამნაშავედ ცნეს წარდგენილ ბრალდებაში და მტკიცებულებები უდავოდ მიიჩნიეს.

„ჩემი დაცვის ქვეშ მყოფი აღიარებს იმას, რომ ნამდვილად, რასაც სატელევიზიო კადრები აჩვენებდა, იმ ეტაპზე იმყოფებოდა იქ და მის მიერ მოხდა საგნის გასროლა იმ მიმართულებით, სადაც იყვნენ სამართალდამცველები განლაგებული- განაცხადა ევა შაშიაშვილის ადვოკატმა მარიამ ხაჭაპურიძემ.

„მტკიცებულებები გავხადეთ უდავოდ. ჩვენ ვფიქრობთ, რომ ამ შესაძლებლობის, შეთავაზების ხელიდან გაშვება არ შეიძლებოდა“, - განაცხადა კიდევ ერთი ბრალდებულის, გოჩა ყატაშვილის ადვოკატმა თამაზ გურაშვილმა.

ჯანდრი თირქიას ადვოკატი მარიამ მოდებაძე ასევე აცხადებს, რომ თირქიამ აღიარა დანაშაული.

„უდავოდ ვცნობთ მტკიცებულებებს. ჯერჯერობით, [საპროცესო შეთანხმება] ოფიციალურად გაფორმებული არ არის, თუმცა, მოლაპარაკებები მიმდინარეობს პროკურატურასთან, საბოლოო წინადადება სავარაუდოდ, მომავალ კვირაში გვეცოდინება“, - განაცხადა მარიამ მოდებაძემ.

„შემოთავაზებული იყო ბრალდების მხარის მხრიდან საპროცესო შეთანხმება, რომლის პირობებიც მისაღები აღმოჩნდა ჩემი დაცვის ქვეშ მყოფისთვის, შესაბამისად, დავთანხმდით. ჩემმა დაცვის ქვეშ მყოფმა ცნო თავი დამნაშავედ წაყენებულ ბრალდებაში და უდავოდ მიიჩნია მტკიცებულებები“, - აცხადებს სულხან აბრალავას ადვოკატი მერაბ წკრიალაშვილი.

პროკურორმა როინ ხინთიბიძემ კი მედიასთან აღნიშნა, რომ დღევანდელ სასამართლო პროცესზე 8 ბრალდებულმა სრულად აღიარა წარდგენილი ბრალდება, თავი დამნაშავედ ცნო და მტკიცებულებები უდავოდ მიიჩნია.

„მათ ასევე განცხადებით ჰქონდათ მომართული ჩვენთვის და შესაბამისად, აღნიშნული სისხლის სამართლის საქმე ამ 8 პირის მიმართ გამოიყო საპროცესო შეთანხმების გაფორმების მიზნით. დარჩენილმა შვიდმა პირმა დღევანდელ პროცესზე განაცხადა, რომ არ აღიარებს ჩადენილ დანაშაულს და თავს არ ცნობენ დამნაშავედ. შესაბამისად, მათთან არ მიმდინარეობს მოლაპარაკება საპროცესო შეთანხმების თაობაზე, თუმცა, თუ შეიცვლიან პოზიციას, რა თქმა უნდა, ჩვენ მზად ვართ, რომ მათთანაც განვიხილოთ საპროცესო შეთანხმების საკითხი“, - განაცხადა პროკურორმა.

როგორც ცნობილია, 4 ოქტომბრის საქმეზე ჩადენილი დანაშაულის აღიარებებს კიდევ რვა ბრალდებულის აღიარება დაემატა. რვავემ თავი დამნაშავედ ცნო და სრულად აღიარა წარდგენილი ბრალდება. შესაბამისად, მათთან საპროცესო შეთანხმება გაფორმდება.