პაატა ბურჭულაძის შვილების თქმით, მათ ტელეფონებსა და კომპიუტერებზე კიბერთავდასხმა მოხდა

პაატა ბურჭულაძის შვილები აცხადებენ, რომ მათ ტელეფონებსა და კომპანიებზე კიბერშეტევები ხორციელდება. ალექსანდრე ბურჭულაძემ მთავარ პროკურატურაში მის მიმართ განხორციელებული სავარაუდო კიბერდანაშაულის ფაქტზე განცხადება ხელახლა შეიტანა. ინფორმაციას 1tv ავრცელებს.

მათი თქმით, პირველი კიბერშეტევა ხუთი თვის წინ, ალექსანდრე ბურჭულაძის ტელეფონსა და მისი კომპანიის კომპიუტერებზე განხორციელდა. რის შემდეგაც მათ პროკურატურას მიმართეს და ფაქტებიც წარუდგინეს, თუმცა მათი თქმით,  პროკურატურის მხრიდან  არანაირი რეაგირება არ მოყოლია.

რამდენიმე კვირის წინ მსგავსი ფაქტები ბურჭულაძის მეორე შვილის, შუქრი ბურჭულაძის ტელეფონზე და მისი კუთვნილი სამშენებლო კომპანიის კომპიუტერებშიც დაფიქსირდა.

12 ივლისს პაატა ბურჭულაძე თბილისის საქალაქო სასამართლოში გამოკითხეს. 

მთავარმა პროკურატურამ ფონდ „იავნანას“ ხელმძღვანელი პირების მიერ დიდი ოდენობით თანხების შესაძლო მითვისება-გაფლანგვის ფაქტზე გამოძიება გასული წლის 20 სექტემბერს დაიწყო.

პროკურატურის ცნობით, გამოძიების დაწყებას საფუძვლად დაედო არასამთავრობო ორგანიზაცია „ახალგაზრდა ფინანსისტთა და ბიზნესმენთა ასოციაციის“ ვიცეპრეზიდენტის განცხადება, რომელშიც განმცხადებელი მიუთითებდა, რომ ფონდ „იავნანას” ხელმძღვანელი პირები შესაძლოა საქველმოქმედო მიზნებისათვის მოპოვებულ თანხებს არამიზნობრივად ხარჯავდნენ.