თბილისის მერის ყოფილი მოადგილე ფარცხალაძის საქმეს განმარტავს

"მიწის მონაცვლეობაზე შეთანხმება ნიკა ალასანიასთან ვერ მოხერხდა, მაგრამ მოხერხდა ოთარ ფარცხალაძის პირობებში. ეს კანონიერი ქმედება იყო, ჯდება კანონის ფარგლებში", - აცხადებს პარლამენტის რეგიონული პოლიტიკის კომიტეტის თავმჯდომარე გრიგოლ ლილუაშვილი, რომელიც თბილისის მერიის მიერ ოთარ ფარცხალაძის კომპანიისთვის მიწების გადაცემის დროს მერის მოადგილის პოსტს იკავებდა.

"მნიშვნელოვანია არა ის, ვინ იყო კერძო კომპანიის 100%-იანი წილის მფლობელი, არამედ ის, რომ მერიას კომპანიის წინაშე ვალდებულება ჰქონდა. რა სარფიანი გარიგება დადო ნიკა ალასანიასთან ოთარ ფარცხალაძემ, მერიის განსახილველი თემა არ არის, რადგან ეს ორ სუბიექტს შორის კომერციული გარიგებაა.

ჩემს საკურატორო სფეროში არ შედიოდა არც ქონების მართვა და არც არქიტექტურა. ამ თემასთან შეხება მქონდა მხოლოდ მთავრობის სხდომაზე.

ეს მიწები ნიკა ალასანიას ჰქონდა შესყიდული. დააკვირდით, რა დროს შეისყიდა და რა დროს დაიწყო ვერეს ხეობაში გზის გაყვანა. ეს იყო მიზანმიმართული ქმედება, ხელოვნური პროცესი რომ ალასანია და მისი გარემოცვა დიდ კომპენსაციას მიიღებდნენ. ეს გიგი უგულავას მერობის პერიოდში ხდება. მაშინ მერიას კომპენსაცია არ მიუცია - ან ვერ მოასწრეს ან ვერ შეთანხმდნენ ან სხვასაც მადა გაუჩნდა.

ჩვენი მმართველობის პერიოდში, როცა კომპანიამ მოგვმართა, მფლობელი უკვე ოთარ ფარცხალაძე იყო. მონაცვლეობას აქვს მეორე მხარე - რას ითხოვენ მონაცვლეობისთვის. ვერავინ იტყვის, რომ ადგილი ჰქონდა უკანონობას, რადგან სახელმწიფო პროექტმა კერძო ნაკვეთზე გაიარა და ან ფულადი კომპენსაცია უნდა გაცემულიყო ან მიწის მონაცვლეობა მომხდარიყო. პროცესი გაჭვირვალე იყო. მერიას ჰქონდა ვალდებულებები კერძო მესაკუთრესთან. ვალდებულებები გაისტუმრეს მიწის მონაცვლეობის გზით.

არ ვიცი, რა დასკვნა აქვს აუდიტის სამსახურს. საინტერესოა, ოპერაციის კანონიერებაზე თუ არის მსჯელობა. მიწა ფარცხალაძის, პეტრიაშვილის თუ პავლიაშვილის კერძო მფობელობაში იყო, მეორეხარისხოვანია.

რატომ არ დაუკმაყოფილეს მოთხოვნა ნიკა ალასანიას, გიგი უგულავას მოჰკითხეთ. ჩემი ვარაუდით, გიგი უგულავას და მიხეილ სააკაშვილის გუნდებს შორის განხეთქილება უკვე არსებობდა. იყო კლანებს შორის გადანაწილების თემა.

ჩვენი მმართველობის დროს გადაწყდა, ბიუჯეტიდან დამატებითი თანხები არ გაცემულიყო და გამოიყო მიწის ნაკვეთი. ოთარ ფარცხალაძის ნაცვლად ნებისმიერი სხვა მოქალაქე რომ ყოფილიყო, იგივე პროცედურა განხორციელდებოდა", - განაცხადა გრიგოლ ლილუაშვილმა.

ნიკა ალასანია მიხეილ სააკაშვილის ბიძაშვილია.

ინფორმაციას ipn-ი ავრცელებს.