პრეზიდენტი მუხტარლის მეუღლეს და შვილებს საქართველოს მოქალაქეობას მიანიჭებს

პრეზიდენტის ადმინისტრაცია, პრემიერმინისტრის მოწოდებას გამოეხმაურა და განაცხადა, რომ საქართველოს პრეზიდენტს მიღებული აქვს გადაწყვეტილება საქართველოს მოქალაქეობა მაქსიმალურად შემჭიდროებულ ვადებში მიანიჭოს აფგან მუხტარლის მეუღლესა და შვილებს,
თუმცა ამისათვის აუცილებელია, რომ მას შესაბამისი დოკუმენტაციით მიმართოს ოჯახმა, - განაცხადა პრეზიდენტის ადმინისტრაციის უფროსმა გიორგი აბაშიშვილმა. ინფორმაციას 1tv ავრცელებს. 

გიორგი კვირიკაშვილმა დღეს მუხტარლის ოჯახის საქმეზე საგანგებო განცხადება გაავრცელა და პრეზიდენტს სთხოვა, შექმნილი ვითარებიდან გამომდინარე, გამონაკლისის სახით, შეძლებისდაგვარად, მოკლე ვადაში მიანიჭოს აფგან მუხტარლის მეუღლესა და შვილებს საქართველოს მოქალაქეობა.

გიორგი აბაშიშვილის თქმით, ის ხვალ შეხვდება აფგან მუხტარლის მეუღლეს და აღნიშნულ საკითხზე დეტალურ ინფორმაციას მიაწვდის. 

აზერბაიჯანელი აქტივისტი და ჟურნალისტი აფგან მუხტარლი ბოლო 2 წელია ოჯახთან ერთად საქართველოში ცხოვრობდა. საქმიანობიდან გამომდინარე, მისი აზერბაიჯანში დარჩენა საფრთხეს წარმოადგენდა. 

მუხტარლის ოჯახის წევრების თქმით, ის თბილისიდან 29 მაისს გაუჩინარდა, სახლიდან გავიდა და არ დაბრუნებულა. მოგვიანებით, ცნობილი გახდა, რომ ის ბაქოში გადაიყვანეს. ბაქოს საქალაქო სასამართლომ მას სამთვიანი წინასწარი პატიმრობა შეუფარდა. ჟურნალისტს აზერბაიჯანის პროკურატურამ ბრალი კონტრაბანდის, სახელმწიფო საზღვრის უკანონო გადაკვეთისა და პოლიციისთვის დაუმორჩილებლობის მუხლებით წარუდგინა.

აფგან მუხტარლის საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ს 143-ე მუხლით, რაც თავისუფლების უკანონო აღკვეთას გულისხმობს. სახელმწიფო უსაფრთხოების სამსახურის ხელმძღვანელის ვახტანგ გომელაურის განცხადებით, აზერბაიჯანელი ჟურნალისტი „მწვანე საზღვარზე“ დააკავეს და არა გამშვებ პუნქტზე.

თუმცა, მუხტარლის ახლობლებს, ჟურნალისტების და არასამთავრობო სექტორის ნაწილს არ სჯერა, რომ მისი საქართველოში გაუჩინარება და აზერბაიჯანში გადაყვანა ქართული სპეცსამსახურების დახმარების თუ მათი უმოქმედობის გარეშე მოხდა.

თბილისში მუხტარლის მხარდამჭერი აქციები იმართება. ფაქტს, საერთაშორისო ორგანიზაციები და უფლებადამცველი ჯგუფები გამოეხმაურნენ.