პრემიერმინისტრი რეპერების დაკავებას ეხმაურება

პრემიერმინისტრი, გიორგი კვირიკაშვილი რეპერების დაკავებას Facebook-ის გვერდზე ეხმაურება. ის პარლამენტს ნარკოპოლიტიკის ლიბერალიზაციისკენ მოუწოდებს და ამისათვის ამ საკითხზე მუშაობის დაჩქარებას თხოვს.

“მსურს, გამოვეხმაურო ნარკოტიკული საშუალებების უკანონოდ შეძენა-შენახვის ფაქტზე დაკავებული ახალგაზრდების, მიხეილ მგალობლიშვილის და გიორგი ქებურიას საქმეს.

უპირველეს ყოვლისა, უნდა აღვნიშნო, რომ ადამიანის უფლებების განუხრელი დაცვა ჩვენი ერთ-ერთი უმთავრესი მონაპოვარია, რომლისთვის ჩრდილის მიყენების შესაძლებლობა არ უნდა დავუშვათ.

ფაქტია, რომ კანონმდებლობა ნარკოპოლიტიკის თვალსაზრისით არის ზედმეტად მკაცრი და საჭიროებს ლიბერალიზაციას. 

ამიტომ, თხოვნით მივმართავ პარლამენტს, დაჩქარდეს ამ საკითხზე მუშაობა, რათა საშემოდგომო სესიისთვის მაინც მოვასწროთ სახეცვლილი, ჰუმანური და ევროპული სტანდარტების შესაბამისი კანონის მიღება.

მინდა, აგრეთვე მივმართო ახალგაზრდობას - ჩვენი მთავრობის ნებისმიერი ნაბიჯი და გადაწყვეტილება არის მიმართული იმისკენ, რომ თქვენ, ჩვენი ქვეყნის მომავალს შეგიქმნათ თავისუფალი და ცივილიზებული გარემო. ჩვენმა თაობამ კარგად ვიცით და გამოვცადეთ საკუთარ თავზე, როგორი არ უნდა იყოს სისტემა და მაქსიმალური ძალისხმევა გვაქვს მიმართული ისეთი ქვეყნის შესაქმნელად, სადაც სიტყვის, გამოხატვის თავისუფლება, პიროვნული ინდივიდუალიზმი იქნება არა დაპირება, არამედ - ფაქტი. არც ერთი ახალგაზრდა , არც ერთი მოქალაქე ამ ქვეყანაში ჩვენი ხელისუფლების პირობებში გამოხატვის თავისუფლების გამო არ დასჯილა და არც მომავალში დგას ჩვენი საზოგადოება ამ საფრთხეების წინაშე.

რაც შეეხება კონკრეტულად ამ ორი ახალგაზრდის დაკავებასთან დაკავშირებულ ვითარებას, პროკურატურამ გააკეთა განცხადება, რომ უმოკლეს ვადაში შეისწავლის აღნიშნული საქმის ფაქტობრივ გარემოებებს.

შესაბამისად, სამართალწარმოების პროცესი ჯერ დასრულებული არ არის“ - წერს პრემიერი.

პროეტქ Birja Mafia-ს წევრები Young Mic (მიშა მგალობლიშვილი) და Kay G (გიორგი ქებურია) პოლიციამ დიდი ოდენობით ნარკოტიკული საშუალების უკანონო შეძენა-შენახვის ბრალდებით დააკავა, რაც 8-დან 20 წლამდე ან უვადო პატიმრობას ითვალისწინებს.

9 ივნისს, ჯგუფის ორივე წევრს სასამართლომ აღკვეთის ღონისძიების სახით პატიმრობა შეუფარდა.  

ჯგუფის ბოლო ვიდეოკლიპია "TSL შავი ზედა". ჯგუფის ერთ-ერთი წევრის, მიშა მგალობლიშვილის ცოლი აცხადებს, რომ მათი დაკავება არა ნარკოდანაშაულს არამედ სწორედ ამ კლიპს უკავშირდება, სადაც პოლიციელია გაშარჟებული. მოგვიანებით, სასამართლო პროცესზე იგივე აღნიშნა ორივე ბრალდებულმა.

რეპერების მხარდამჭერი აქცია გუშინ თბილისში, ვაკის პარკში  დაიწყო. მონაწილეები აქციების გაგრძელებას საქართველოს მასშტაბით აანონსებენ. დღეს პროტესტი გაგრძელდა თბილისში, ზუგდიდსა და ბათუმში.