საგარეო: სოსო ოსორაული დიდი ალბათობით დაღუპულია

"სოსო ოსორაული დიდი ალბათობით დაღუპულია,"- ამის შესახებ ჟურნალისტებს საგარეო საქმეთა მინისტრის მოადგილემ ზვიად გონაძემ განუცხადა. ის ამბობს, რომ სწორედ ეს ინფორმაცია მიაწოდა და საქმის კურსში ჩააყენა ოჯახიც. თუმცა მინისტრის მოადგილე ამბობს, რომ წყაროები მხოლოდ ზეპირსიტყვიერად ადასტურებენ მფრინავის დაღუპვას, ფაქტობრივი დამადასტურებელი მასალა კი არ არსებობს.

"სოსო ოსორაულის კვალი 13 მაისს იკარგება, თუმცა ოჯახის წევრებს დადასტურებულად ვერ ეუბნებიან გარდაცვლილია თუ ცოცხალია მფრინავი,"- ეს განცხადება საგარეო საქმეთა სამინისტროდან გამოსვლის შემდეგ ოჯახის ახლობლებმა განაცხადეს. მათი თქმით, შეხვედრაზე რამდენიმე ვიდეოფირი და წერილი აჩვენეს, რომელიც სოსო ოსორაულის დაწერილია. ასევე აჩვენეს დამადასტურებელი ინფორმაცია, რომ საგარეო საქმეთა სამინისტროს წარმომადგენლები ცდილობდნენ ინფორმაციის მოპოვებას.

შეხვედრას პარლამენტის წევრი გელა სამხარაულიც ესწრებოდა, ის ამბობს, რომ აქვთ ცნობა შეტაკებეbის და მსხვერპლის შესახებ, თუმცა დადასტურებულად თქმა გარდაცვლილია თუ არა მფრინავი, ჯერ შეუძლებელია.

კონგოში დაკარგული ქართველი მფრინავის სოსო ოსორაულის ოჯახის წევრებს დღეს საგარეო საქმეთა მინისტროს მოადგილე ზვიად გონაძე შეხვდა. მანამდე ოსორაულის მხარდასაჭერად საგარეო საქმეთა სამინისტროსთან და პარლამენტთან აქციები გაიმართა. საგარეო საქმეთა სამინისტროსთან გამართულ აქციაზე ორი ადამიანი დააკავეს. 

მეამბოხეებმა კონგოს დემოკრატიული რესპუბლიკის სამხედრო-საჰაერო ძალების ორი შვეულმფრენი 27 იანვარს ჩამოაგდეს. ერთ-ერთ შვეულმფრენს საქართველოს მოქალაქე სოსო ოსორაული მართავდა, რომელიც ტყვედ აიყვანეს. ოსორაულის ტყვედ ჩავარდნის შესახებ ინფორმაცია 22 თებერვალს სამხედრო ბლოგერმა და უფლებადამცველმა Facebook-ზე გაავრცელა. დავით ნემსაძემ მთავრობას ქართველი მფრინავის ტყვეობიდან დახსნისკენ მოუწოდა.

სოსო ოსორაული წლების განმავლობაში ქართულ ჯარში მსახურობდა. თავდაცვის სამინისტროს ინფორმაციით, ის შეიარაღებული ძალებიდან 2015 წელს, საკუთარი განცხადების საფუძველზე წავიდა.

24 მაისს საგარეო საქმეთა მინისტრის მოადგილის განცხადებით, კონგოში მომხდარი შეტაკებების დროს ოსორაული, სავარაუდოდ, დაიღუპა, თუმცა მოგვიანებით, ბრიგადის გენერალმა, ამირან სალუქვაძემ განაცხადა, რომ ქართველი მფრინავის შესახებ სხვა იქ მყოფი სამხედროებისგან მიიღო ინფორმაცია და ირწმუნება, რომ ის ცოცხალია.