ჯანი ბუკიკიომ მკაცრი განცხადების შემდეგ ტონი შეარბილა

ვენეციის კომისიის თავმჯდომარე, ჯანი ბუკიკიო საკონსტიტუციო ცვლილებების გარშემო მისი იმედგაცრუების შესახებ გაკეთებული განცხადების შემდეგ ტონს არბილებს და ჟურნალისტებთან მორიგ კომენტარს აკეთებს.

“საერთო ჯამში კონსტიტუციური ცვლილებები პოზიტიურად ფასდება. ჩემი მთავარი მესიჯი ეხება კონსესუსის საჭიროებას. ყველა პოლიტიკური პარტია და მონაწილე მხარე უნდა შეთანხმდეს ერთიან მიდგომებზე, წინააღმდეგ შემთხვევაში მთელი ეს ძალისხმევა უშედეგო იქნება. დანარჩენი, ვფიქრობ, ქვეყნის შიდა საქმეა და ჩემი მთავარი მესიჯი, რომელსაც ხვალ პარლამენტის თავმჯდომარეს, პრეზიდენტს და ოპოზიციას გავაცნობ, სწორედ კონსესუსის საჭიროებას შეეხება“ - აცხადებს ვენეციის კომისიის თავმჯდომარე.

წინა განცხადებაში ბუკიკიო აღნიშნავდა, რომ იმედგაცრუებულია, რადგან პროცესი იმედისმომცემი იყო, ახლა კი ყველაფერი კითხვის ნიშნის ქვეშ დადგა.

ჟურნალისტებთან ვენეციის კომისიის თავმჯდომარემ ისიც აღნიშნა, რომ ბათუმში, პრეზიდენტის მიერ გამართულ მიღებაზე ყველა ამ განცხადების გამო თხოვდა განმარტებას.

ჯანი ბუკიკიო საქართველოში დღეს 40-ზე მეტი ქვეყნის 200-მდე სტუმართან ერთად ჩამოვიდა, რომელთა შორისაც არიან საკონსტიტუციო სასამართლოების თავმჯდომარეები და მოსამართლეები.

სტუმრები  ევროპის საკონსტიტუციო სასამართლოების კონგრესში მიიღებენ მონაწილეობას, რომელიც საქართველოს საკონსტიტუციო სასამართლოს ორგანიზებით დღეიდან 1 ივლისის ჩათვლით, ბათუმში გაიმართება.

საკონსტიტუციო ცვლილებებთან დაკავშირებით ვენეციის კომისიის რეკომენდაციები 19 ივნისს გახდა ცნობილი. ევროპელმა ექსპერტებმა რჩევები 111-ე პლენარული სესიის ფარგლებში 16 ივნისს მიიღეს. საკონსტიტუციო ცვლილებების მიხედვით: პრეზიდენტს საარჩევნო კოლეგია ირჩევს, მაჟორიტარული სისტემა უქმდება, ოჯახის დეფინიცია განისაზღვრება, გენერალურ პროკურორს პარლამენტი ამტკიცებს, მოსამართლეების წარდგენა-დანიშვნაში პრეზიდენტის უფლებები იზღუდება, ევროპულ და ევროატლანტიკურ სტრუქტურებში ინტეგრაცია ჩაიწერება, პარლამენტის ადგილსამყოფელი განსაზღვრული არ არის.