მაიკ პენსი: ჩვენ მკაცრად ვგმობთ საქართველოს ოკუპაციას

საქართველოს პრეზიდენტი გიორგი მარგველაშვილი და აშშ-ის ვიცეპრეზიდენტი მაიკ პენსი ვაზიანის სამხედრო ბაზაზე იმყოფებიან. გიორგი მარგველაშვილმა "ღირსეული პარტნიორი 2017"-ის მონაწილეებს სიტყვით მიმართა და მაიკ პენსის ვიზიტის მნიშვნელობაზე ილაპარაკა. წვრთნების მონაწილეებს მიმართა აშშ-ის ვიცეპრეზიდენტმა მაიკ პენსმაც. მან ამერიკელ ჯარისკაცებს აშშ-ის მთავარსარდლის მისალმება გადასცა და მისიებში მონაწილეობისთვის შეაქო.

"პრეზიდენტის დავალებით ვიმყოფები აქ, ამ დროს, იმისთვის, რომ უბრალოდ მადლობა გითხრათ იმ სამსახურისთვის, რომელსაც თქვენ სამშობლოს უწევთ, დგახართ აქ გაერთიანებულნი თავისუფლების დასაცავად. ამერიკა და საქართველო გაერთიანებულნი არიან ერთიანი ღირებულებებით, რაც თავისუფლებისეკნ სწრაფვას გულისხმობს.

დღეს ჩვენ აქ ვართ იმისთვის, რომ ხაზი გავუსვათ ჩვენ ურყევ პოზიციას და ვუთხრათ ქართველ მეგობრებს - თქვენ გვერდით ვდგავართ. საქართველოს, ქართველების გვერდზე ვდგავართ და გიჭერთ ნატოში გაწევრიანების მისწრაფებაში მხარს. ის რაც გვაკავშირებს ეს გახლავთ დემოკრატია, კანონის უზენაესობა.

საქართველოს დასაბამი ანტიკურ ხანაში უნდა ვეძებოთ. საქართველოს გააჩნია უდიდესი კულტურა და მემკვიდრეობა და ათასწლეულების განმავლობაში ვერავინ წაგართვათ თვითმყოფადობა, საქართველოს კულტურამ დროს გაუძლო. 

არცთუ ისე დიდი ხნის წინ საქართველო საბჭოთა კავშირის საპყრობილეში იყო. საბჭოთა კავშირი თქვენი ისტორიის წაშლას ცდილობდა. მას სურდა ამოეშალა და ხელეყო თქვენი თვითმყოფადობა. საქართველომ აღიდგინა თავისუფლება. თქვენ გაუწოდეთ ევროპის ერებს და ამერიკას მეგობრობის ხელი და ამერიკამაც იმავეთი გიპასუხათ.

მიმდინარე წელი ჩვენი დიპლომატიური ურთიერთობების დამყარების 25 წლის იუბილეა. საქართველოს მომავალი დასავლეთ სამყაროშია. საქართველო წლების განმავლობაში ამერიკის პარტნიორი იყო. ათასობით მოსამსახურე მსახურობდა ერაყში, ავღანეთში. საქართველომ ერთ სულ მოსახლეზე უფრო მეტი მოსამსახურე გააგზავნა საერთაშორისო მისიებში, ვიდრე ნებისმიერმა სხვა ქვეყანამ.

და დღეს ჩვენ მოვიხსენიებთ 31 დაღუპულ ქართველ ჯარისკაცს, რომლებმაც სიცოცხლე დადეს თავისუფლებისთვის ბრძოლაში. ისინი გმირები არიან და გარწმუნებთ, რომ ყოველთვის დარჩებიან ამერიკელი ხალხის გულებში.

სტრატეგიული პარტნიორობა საქართველოსა და ამერიკას შორს ახლა უფრო ძლიერია ვიდრე ოდესმე. ღირსეული პარტნიორები თავს უყრის ერთად საქართველოსა და სხვა ქვეყნების მოსამსახურეებს. ეს აძლევს საქართველოს საშუალებას, რომ თავი დაიცვას მომავალში და ნატოს წევრი ქვეყანა გახდეს. ამერიკა და ჩვენი მოკავშირეები დიდ ყურადღებას უთმობენ საქართველოს უსაფრთხოებას და არ დაიშურებენ ძალას, რათა დაეხმარონ ამ მიმართულებით.

პრეზიდენტი ტრამპი და აშშ უჭერს მხარს ბუქარესტის სამიტის გადაწყვეტილებას, რომ საქართველო ნატოს წევრი გახდეს. მან ბევრს მიაღწია უსაფრთხოების კუთხით. ის ლიდერია ნატოს სხვა ქვეყნებთან შედარებით, იმის თვალსაზრისით, რომ საქართველო მთლიანი შიდა პროდუქტის 2%-ს ხარჯავს თავდაცვაზე, რასაც ბევრი სხვა ქვეყანა ვერ ახერხებს. მადლობა ასეთი მაღალი პასუხისმგებლობისთვის.

საქართველოს სამხედრო ხარჯი იძულებით არის გაღებული, მაგრამ ეს არის იმ ქვეყნების არჩევანი, რომელიც თავისუფლებას ირჩევენ და ჩვენ ვდგავართ თავისუფლების დაცვის წინა ხაზზე, თავისუფლებისა, რომელმაც დარტყმა განიცადა რუსეთის მხრიდან და დღესაც ვხედავთ ამ შედეგებს აფხაზეთის და ოსეთის ტერიტორიაზე რუსული ტანკების განლაგებით. ჩვენ მკაცრად ვგმობთ საქართველოს ოკუპაციას. 

გარწმუნებთ, რომ აშშ გააგრძელებს საქართველოს სუვერენიტეტის მხარდაჭერას. დონალდ ტრამპის ადმინისტრაციის პირობებში აშშ არცერთ ქვეყანას არ მისცემს უფლებას კითხვის ნიშნის ქვეშ დააყენოს ეს საკითხი. პრეზიდენტი ტრამპი და ჩვენ მოვუწოდებთ რუსეთს, შეწყვიტოს აგრესია. ძალა ერთობაშია. ღმერთმა დალოცოს ამერიკა და საქართველო", - განაცხადა მაიკ პენსმა.

მრავალეროვნული სწავლება "ღირსეული პარტნიორი 2017" ვაზიანის სამხედრო აეროდრომზე 30 ივლისს დაიწყო და 12 აგვისტოს დასრულდება.

წვრთნაში ნატო-ს წევრი და პარტნიორი 8 ქვეყნის - საქართველო, აშშ, გაერთიანებული სამეფო, გერმანია, თურქეთი, სლოვენია, სომხეთი, უკრაინა - 2 800-ზე მეტი სამხედრო მონაწილეობს, გზავნილით - "ძალა პარტნიორობაშია". საქართველო მრავალეროვნულ სწავლება "ღირსეული პარტნიორი 2017"-ს უკვე მესამედ მასპინძლობს.