მოსამართლეობის კანდიდატების ჩავარდნას თბილისში პოლიტიკური ურთიერთბრალდებები მოჰყვა

24 იანვარს, ევროსაბჭოს საპარლამენტო ასამბლეის კომიტეტმა ჩააგდო საქართველოდან წარდგენილი ადამიანის უფლებათა ევროპული სასამართლოს მოსამართლეობის კანდიდატები. გავრცელებული ინფორმაციით, მოსამართლეების სია თავიდან არის წარსადგენი. კონკურსი აპრილამდე ხელახლა უნდა ჩატარდეს.

საპარლამენტო უმცირესობის წევრის, გიორგი კანდელაკის თქმით, კანდიდატების ჩავარდნა სამარცხვინოა: “ამის მიზეზი სიის ფორმირების პროცესში არსებული უზარმაზარი დარღვევები, სამარცხვინო დარღვევებია. სიის ჩაგდება ნებისმიერი ქვეყნისთვის არის უდიდესი სირცხვილი და თავის მოჭრა. იმედია, რომ ამის შემდეგ მაინც ისწავლის საქართველოს მთავრობა ოდნავ უფრო ცივილიზებულად მოქცევას.”

"ძალიან ბევრი არასწორი და ცრუ ინფორმაცია ვრცელდება იმ პირების მხრიდან, ვინც არც მონაწილეა ამ პროცესისა და არც პირველწყაროდან აქვს ინფორმაცია. კომიტეტი დახურულია და ინფორმაცია კონფიდენციალურია. განსაკუთრებით მათ, ვისაც დიპლომატიური წარსული აქვთ, უნდა იცოდნენ, რომ ასეთი არასწორი ცნობების გავრცელება დახურული კომიტეტის შინაარსობრივ ნაწილზე არ შეიძლება. რეალობა არის ის, რომ კომიტეტის წევრთა უმრავლესობამ მიიჩნია, რომ უკეთესი იქნება თუ პროცედურები იქნება გავლილი თავიდან... კომიტეტმა ჩათვალა, რომ საჭიროა მთავრობამ პროცედურა ხელახლა გაიაროს და ახალი კანდიდატები აპრილში ევროპის საბჭოს საპარლამენტო ასამბლეის საგაზაფხულო სესიამდე წარადგინოს”, - განაცხადა "საზოგადოებრივ მაუწყებელთან" ინტერვიუში პარლამენტის იურიდიულ საკითხთა კომიტეტის თავმჯდომარემ ეკა ბესელიამ.

PalitraNews-ის ეთერში პრეზიდენტის საპარლამენტო მდივანმა ანა დოლიძემ თქვა, რომ, მისი ინფორმაციით, საქართველო იმ ქვეყნების სიაში მოხვდა, რომლებმაც არ დააკმაყოფილეს ევროსაბჭოს სტანდარტები. "სია მთლიანად უარყოფილია, რაც ნიშნავს იმას, რომ სტანდარტები, როგორებიცაა გამჭვირვალობა, საჯაროობა, სამართლიანობა, არადისკრიმინაციულობა, კანდიდატების შერჩევის პროცესში არ გავითვალისწინეთ", - თქვა დოლიძემ და დასძინა, რომ ამ ფაქტს საქართველოსთვის რეპუტაციული ფასიც აქვს.

ევროსასამართლოს მოსამართლეობის კანდიდატები იყვნენ ევა გოცირიძე, ალექსანდრე ბარამიძე და გიორგი ბადაშვილი. ევა გოცირიძე 2013 წლიდან იუსტიციის უმაღლესი საბჭოს წევრია; ალექსანდრე ბარამიძე 2012 წლიდან იუსტიციის მინისტრის პირველი მოადგილეა; გიორგი ბადაშვილი 8 წელია ადამიანის უფლებათა ევროპულ სასამართლოში იურისტის პოზიციაზე მუშაობს. საქართველოდან წარდგენილი სამი კანდიდატურიდან ადამიანის უფლებათა ევროპული სასამართლოს მოსამართლის ამრჩევ კომიტეტს ერთი მათგანი უნდა დაენიშნა სტრასბურგის სასამართლოს მოსამართლედ.

საქართველოდან წარსადგენი კანდიდატების შერჩევის პროცესი ეჭვქვეშ დააყენა არსამთავრობო ორგანიზაციების ნაწილმა, ხოლო ადვოკატთა ასოციაციის თავმდჯომარემ ევა გოცირიძის კანდიდატურის წინააღმდეგ 26 სექტემბერს სტრასბურგის სასამართლოსთან აქცია გამართა.