უზენაესმა სასამართლომ რუსთავი 2 ქიბარ ხალვაშს მიაკუთვნა

საქართველოს უზენაესი სასამართლოს დიდმა პალატამ ტელეკომპანია "რუსთავი 2" ქიბარ ხალვაშს მიაკუთვნა. ეს გადაწყვეტილება დიდმა პალატამ ცოტა ხნის წინ მიიღო.

უზენაესი სასამართლოს დიდმა პალატამ ტელეკომპანია "რუსთავი 2"-ისა და მისი მფლობელების, ძმებ ლევან და გია ყარამანიშვილების საკასაციო საჩივარი განიხილა. ტელეკომპანიის წილებთან დაკავშირებული დავა უზენაესი სასამართლოს დიდმა პალატამ ზეპირი მოსმენის გარეშე განიხილა და ახალი გადაწყვეტილება და განჩინებები ერთხმად მიიღო.

გადაწყვეტილება საბოლოოა და გასაჩივრებას არ ექვემდებარება.

უზენაესი სასამართლოს დიდ პალატაში შედიოდნენ: თოდუა, გვენეტაძე, როინიშვილი, გასიტაშვილი, ქათამაძე, ალავიძე, ვაჩაძე, ძლიერეიშვილი, შავლიაშვილი. ორივე მხარე მოსამართლეების აცილებას ითხოვდა.

მთელი დღის განმავლობაში უზენაეს სასამართლოსთან "რუსთავი 2"-ისა და მისი მხარდამჭერების აქცია მიმდინარეობდა. სასამართლოს გადაწყვეტილების გაცნობის შემდეგ კი განაცხადეს, რომ ისინი "რუსთავი 2"-თან გადაინაცვლებენ.

ტელეკომპანია "რუსთავი 2"-სა და მისი მფლობელების, ძმებ ლევან და გია ყარამანიშვილების საკასაციო საჩივარს, თავდაპირველად, სამი მოსამართლისგან - პაატა ქათამაძის, ბესარიონ ალავიძისა და ეკატერინე გასიტაშვილისგან შემდგარი კოლეგია განიხილავდა, თუმცა, მათი გადაწყვეტილებით, სარჩელი განსახილველად უზენაესი სასამართლოს დიდ პალატას გადაეცა.

ტელეკომპანიის წილებზე სამართლებრივი დავა მეორე წელია მიმდინარეობს. წილის სამართლებრივი გზით დაბრუნებას ბიზნესმენი ქიბარ ხალვაში ცდილობდა. ამავდროულად, "რუსთავი 2"-თან დაკავშირებით პრეტენზიას თავდაპირველი დამფუძნებლები - ჯარჯი აქიმიძე და დავით დვალიც აცხადებენ. მათი თქმით, ვარდების რევოლუციის შემდეგ "ნაციონალური მოძრაობის" ლიდერებმა წილები ძალით დაათმობინეს.

სამართლებრივი დავა აქტიურ ფაზაში "ქართული ოცნების" ხელისუფლებაში მოსვლის შემდეგ შევიდა. "რუსთავი 2"-ის გენერალური დირექტორი და წარმომადგენლები, რომლებიც არ მალავენ, რომ არხის სარედაქციო პოლიტიკა თანხვედრაშია "ნაციონალური მოძრაობის" ღირებულებებთან და ეფუძნება მმართველი გუნდის მკაცრ კრიტიკას, აცხადებენ, რომ ხელისუფლება ცდილობს "რუსთავი 2"-ის გაჩუმებას და აპირებს ტელეკომპანიის ხელში ჩაგდებას, ხალვაშის გამოყენებით.

მთავრობა ბრალდებებს უარყოფს და აცხადებს, რომ "რუსთავი 2"-ის მენეჯმენტი სამართლებრივი დავის პოლიტიკურ ჭრილში წარმოჩენას ცდილობს და არხს მიზანმიმართული კამპანიებით სასამართლო სისტემაზე და მოსამართლეებზე ზეწოლისთვის იყენებს.