ურსულა ფონ დერ ლაიენი: საქართველო უნდა ელოდოს ერთობლივად დასახული მკაფიო მიზნების კომბინაციასა და ფინანსურ მხარდაჭერას

საქართველო უნდა ელოდოს ერთობლივად დასახული მკაფიო მიზნების კომბინაციას და ფინანსურ მხარდაჭერას, ასევე, ვაჭრობის განვითარებას საქართველოსა და ევროკავშირს შორის, ეს ყველაფერი საქართველოს კეთილდღეობას მოუტანს და გააღრმავებს ურთიერთობებს საქართველოსა და ევროკავშირს შორის - ამის შესახებ ევროკომისიის პრეზიდენტმა „აღმოსავლეთ პარტნიორობის“ წევრი ქვეყნების ლიდერთა და ევროკავშირის ლიდერების შეხვედრის შემდეგ გამართულ პრესკონფერენციაზე საზოგადოებრივი მაუწყებლის კითხვის საპასუხოდ განაცხადა.

ურსულა ფონ დერ ლაიენის თქმით, პირველ რიგში, ევროკავშირი გააქტიურებს საქართველოს მაკროეკონომიკურ მხარდაჭერას და ასევე, ვაჭრობას ევროკავშირსა და საქართველოს შორის.

„ინვესტიციების დაბანდებას ვგეგმავთ მცირე და საშუალო საწარმოებში, რათა გაუმჯობესდეს ეკონომიკური მდგომარეობა. მაგალითად, მობილობის გაუმჯობესება. ასევე იქნება ინვესტიციები კავშირების განმტკიცებაში, რაც ასევე მოიცავს ციფრულ ინფრასტრუქტურას, რაც ჩვენთვის მნიშვნელოვანია“, - აღნიშნა ურსულა ფონ დერ ლაიენმა.

მისივე თქმით, ევროკავშირი ასევე მხარს დაუჭერს პროექტებს, რომლებიც ეკონომიკას უფრო მეტად მწვანეს გახდის, რაც კლიმატის ცვლილებებთან ბრძოლას შეუწყობს ხელს.

„გავაკეთებთ ყველაფერს, რაც ჩვენ შეგვიძლია ინსტიტუტების გასაძლიერებლად, ასევე შესაძლებლობას, რომ კანონის უზენაესობა დაცული იყოს. ასევე, მხარს დავუჭერთ კარგი მმართველობის განვითარებას. ასე რომ, საქართველო უნდა ელოდოს ერთობლივად დასახული მკაფიო მიზნების კომბინაციას და ფინანსურ მხარდაჭერას. ასევე, ვაჭრობის განვითარებას საქართველოსა და ევროკავშირს შორის. ეს ყველაფერი საქართველოს კეთილდღეობას მოუტანს და გააღრმავებს ურთიერთობებს საქართველოსა და ევროკავშირს შორის“- განაცხადა ურსულა ფონ დერ ლაიენმა.