მეუფე იაკობი: საქართველო რომ უყვარდეთ, მოილაპარაკებდნენ, თუ ვერ მოილაპარაკეს, ჩათვალეთ, რომ არცერთ მხარეს არ უყვარს საქართველო

საქართველო რომ უყვარდეთ, მაშინ მოილაპარაკებდნენ, თუ ვერ მოილაპარაკეს, ჩათვალეთ, რომ არცერთ მხარეს არ უყვარს საქართველო, - ამის შესახებ ბოდბელმა მთავარეპისკოპოსმა, იაკობმა ქადაგებისას განაცხადა.

მეუფე ხელისუფლებასა და ოპოზიციას შორის დიალოგის გამართვის საკითხს გამოეხმაურა.

მისივე თქმით, საქართველოს იმისთვის სჭირდება გონიერი პოლიტიკოსები, რომ ერს ემსახურონ და არა იმისთვის, რომ ვიღაცამ ძალაუფლება გაიმყაროს.

„არჩევნები მართლაც რომ გადადებულიყო, რა იქნებოდა? რომ ჩავატარეთ, რა მივიღეთ. უცხოელები, ჩვენი პარტნიორებიც გვეუბნებოდნენ. მოდით, მარტივად შევხედოთ, ვთქვათ, მარტო 90 კაცი შევიდა და სხვა არავინ, რა პარლამენტი იქნება?! ან თუნდაც მინისტრები ან სხვები აირჩიონ, ხომ ვიცით, რომ ნდობა არ ექნებათ. ავიღოთ მეორე მხარე, ვთქვათ გარეთ დარჩა, მე არც შესვლისკენ მოვუწოდებ და არც გარეთ ყოფნისკენ, უბრალოდ დავფიქრდეთ ქართველები, რისთვის გვინდა ხელისუფლება. ჩვენ გვინდა 150 გონიერი ადამიანი, რომ ქვეყანა მართონ. იმისთვის ხომ არ გვინდა, რომ ვიღაცამ ძალაუფლება გაიმყაროს. გვინდა, რომ ჩვენს ერს ემსახუროს. აშშ ჩვენთვის მთავარი სტარტეგიული პარტნიორია. ფიქრობენ, რომ ნატოზე ადრე ევროკავშირში შევალთ. შე დალოცვილო, ერთიც გელაპარაკება და მეორეც, ნუთუ ასე რთულია მოლაპარაკებაზე წასვლა?! საქართველო რომ უყვარდეთ, მაშინ მოილაპარაკებდნენ. თუ ვერ მოილაპარაკეს, ჩათვალეთ, რომ არცერთ მხარეს არ უყვარს საქართველო. ვერ ვხედავ დამაბრკოლებელ მიზეზს იმისთვის, რომ ვერ მოილაპარაკონ. ჩვენთან ისეთი სისტემაა შექმნილი, ვინც სათავეში მოვა, მერე სათავისოდ იყენებს. ძალოვანი სისტემაა, სასამართლო თუ სხვა“, - აღნიშნა მეუფემ.

მისი თქმით, „მეორე ტური ვიღაცისთვის არჩევანი იყო და ვიღაცისთვის სეირი“.

„ხომ უნდა დაფიქრდნენ, ვისი სახელით ლაპარაობენ. რაღაცაზე ხალხი ორივე მხარეზე გაბრაზებულია. იქით „ნაციონალური მოძრაობაა“. თვითონ შეხედონ, ერი მზად არის, რომ „ნაციონალური მოძრაობა“ მოუშვან ხელისუფლებაში? კარგად გადახედონ. ხელისუფლებასაც ამდენი ბერკეტი რომ აქვს და თბილისში ერთ რაიონსაც ვერ იგებს. ეს ჩემთვის ბევრისმანიშნებელია და თვითონაც ხვდებიან“, - აღნიშნა მეუფე იაკობმა.

მისი შეფასებით, უშედეგო მოლაპარაკების გამო სირცხვილია ფასილიტატორ ელჩებთანაც, რომლებიც „საქართველოში საბავშვო ბაღს უყურებენ“.

„ზოგი ამბობს, ჩვენ თვითონვე უნდა გადავწყვიტოთ ჩვენი საკითხიო. რაღაც რომ არის, რატომ გარბიხართ უცხოეთში, წერილები რომ წეროთ? ორმაგი სტანდარტი არ შეიძლება. რადგან ერთი მხარეც ამბობს არას და მეორეც, ელჩებთანაც სირცხვილია. ისინიც სახელმწიფოს წარმოადგენენ და აქ საბავშვო ბაღს უყურებენ, მიდის ვაჭრობა. ვისზე ვაჭრობთ, საქართველოსთვის? საქართველო ხომ მძიმე მდგომარეობაშია. რომ შემოვიდეს რუსი, ახლა ხომ გაგვყოფს. რამდენ კუთხეს ჩამოგაცილებს არ ვიცით? ამიტომ კეთილი ინებონ და რადგან არჩევნებმა ამდენი მსხვერპლი გამოიწვია და ამდენი დაავადებულია, აიღონ პასუხისმგებლობა და ისე გააკეთონ, რომ ერი არ დაზიანდეს. პასუხს მოვთხოვთ, ბოლოს და ბოლოს, რატომ არა?!“, - აღნიშნა მეუფე იაკობმა.