„იმედის“ ჟურნალისტის ექსპერიმენტი - გახარიას მიერ დასახელებულ ვენის კლინიკაში ნარკოლოგიურ შემოწმებას საერთოდ არ აკეთებენ

იმედის ჟურნალისტი ქეთევან ქარდავა ვენაში ჩავიდა და შეეცადა გაერკვია, ჩაიტარა თუ არა პარტია „საქართველოსთვის“ თბილისის მერობის კანდიდატმა გიორგი გახარიამ კლინიკა RUDOLFINERHAUS-ში ნარკოტესტი, რომლის შედეგები მან სოციალურ ქსელში გაასაჯაროვა.

როგორც ჟურნალისტი აცხადებს, მას ისიც კი არ დაუდასტურეს, იყო თუ არა გიორგი გახარია ავსტრიაში ჩასული.

„პირველ რიგში მე დავრეკე საავადმყოფოში, რომელიც მითითებულია დასკვნაზე და პირველად მათ წარვუდექი, როგორც ჟურნალისტი, შემდეგ კი როგორც პაციენტი, რომელსაც ნარკოტესტის ჩატარება სურდა. მათ მითხრეს, რომ ნარკოლოგიური განყოფილება ამ საავადმყოფოში არ არის. ადამიანმა, რომელმაც მიმღებში მიპასუხა, ეს ინფორმაცია რამდენიმე კოლეგასთანაც გადაამოწმა და მითხრა, რომ 20 წელია, ამ საავადმყოფოში ნარკოლოგიური ტესტი არ ჩატარებულა. ამის შემდეგ მე მას ვუთხარი, რომ მაქვს დასკვნა, რომელზეც სწორედ ეს საავადმყოფოა მითითებული და ასევე მათი ექიმი, მუჰამედ ბაღეი. მან მითხრა, რომ ძალიან უცნაურია და სურდათ ეს ინფორმაცია თავად ექიმთან გადაემოწმებინათ. ცოტა ხანში ამ ადამიანმა მითხრა, რომ ექიმმა გადაწყვიტა, რომ ეს ინფორმაცია არის კონფიდენციალური და ამ თემაზე ის საუბარს არ აპირებს. შემდეგ მე მათ ვუთხარი, რომ მინდა ნარკოტესტის ჩაბარება, რაზეც მიპასუხეს, რომ სხვა კლინიკა უნდა შევარჩიო“, - ამბობს ქეთევან ქარდავა.

ამის შემდეგ ჟურნალისტმა ექიმ ბაღეის ძებნა დაიწყო, რომელიც ვენაში მდებარე კიდევ ერთ კერძო კლინიკაში მუშაობს. ის ექიმს დაელოდა, რომელიც მის გამოჩენაზე და კითხვებზე აფორიაქდა.

„თითქოს ძალიან მარტივი კითხვაა, იყო თუ არა გიორგი გახარია მის კლინიკაში ან იცნობს, თუ არა ამ პაციენტს. მე ვაჩვენე მას დოკუმენტი, რომელიც საჯაროა. ის იმდენად აფორიაქდა, რომ უმისამართოდ დაიწყო ვენის ცენტრში სიარული. ჩვენ გავეკიდეთ მას, მაგრამ ვერ მივიღეთ პასუხი. ბაღეი ამბობდა მხოლოდ ერთს, რომ ეს არის კონფიდენციალური ინფორმაცია და დამემუქრა იმითაც, რომ გამოიძახებდა პოლიციას. დამრჩა ისეთი შთაბეჭდილება, მან არ იცოდა გიორგი გახარიას შესახებ არაფერი“, - ამბობს ქეთევან ქარდავა.