ჯაფარიძე: არჩევნების სამუშაო დღეს დანიშვნა ხელისუფლებას აწყობს

„გირჩის“ ლიდერმა, ზურაბ ჯაფარიძემ თქვა, რომ არჩევნების სამუშაო დღეს დანიშვნის შემთხვევაში შემცირდება ამომრჩეველთა აქტივობა და ხელისუფლებას იმედი აქვს, რომ ამით ისარგებლებს.  ამის შესახებ "რადიო თავისუფლება" წერს.

„თუ სამუშაო დღეს დაგეგმავენ არჩევნების მეორე ტურის ჩატარებას, გასაგები იქნება მიზანი, რომ არჩევნებზე გამოცხადება იყოს უფრო ნაკლები, ვიდრე იქნებოდა დასვენების დღეებში. ამ შემთხვევაში, ალბათ, იმედი აქვთ, რომ საკუთარი ელექტორალური რესურსის, რომელიც ძირითადად იგივე ადმინისტრაციული რესურსია, უფრო უკეთ მობილიზებას შეძლებენ, ვიდრე ამას შეძლებს ოპოზიცია. ალბათ, მათ ამაზე აქვთ გათვლა. თუმცა არ მგონია, რომ ამან იმუშაოს“, - განაცხადა ზურაბ ჯაფარიძემ.

"ქართული ოცნების" მიერ მხარდაჭერილი დამოუკიდებელი საპრეზიდენტო კანდიდატი სალომე ზურაბიშვილი ფიქრობს, რომ არჩევნების მეორე ტურის სამუშაო დღეს ჩატარება ქართულ დიასპორას არჩევნებში მონაწილეობის მიღებას, სავარაუდოდ გაურთულებს.

პარტია „ქართული ოცნების“ გენერალურმა მდივანმა კახა კალაძემ საპრეზიდენტო არჩევნების მეორე ტურის თარიღთან დაკავშირებით დასმული კითხვის პასუხად განაცხადა, რომ პრობლემას ვერ ხედავს, თუ არჩევნები სამუშაო დღეს ჩატარდება.

ცენტრალურ საარჩევნო კომისიაში 13:00 საათზე დანიშნული სხდომა 19:00 საათამდე გადაიდო.  დღევანდელ სხდომაზე ცესკოს ერთ-ერთი მთავარი განსახილველი საკითხი საპრეზიდენტო არჩევნების მეორე ტურის თარიღზე შეჯერებაა.

დღის წესრიგის მიხედვით, სხდომაზე შეჯამდება საქართველოს პრეზიდენტის 2018 წლის 28 ოქტომბრის არჩევნების პირველი ტურის შედეგები. ასევე იმსჯელებენ 28 ოქტომბრის არჩევნების მეორე ტურისთვის სახელმწიფოს მიერ გამოყოფილი თანხის განაწილებისა და გამოყენების წესის განსაზღვრის თაობაზე.

7 ნოემბერს ცესკომ განაცხადა, რომ კანონდარღვევა არ იქნება თუ მეორე ტური სამუშაო დღეს ჩატარდება.საქართველოში საპრეზიდენტო არჩევნების პირველი ტური 28 ოქტომბერს გაიმართა. 

ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების - 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

2018 წლის საპრეზიდენტო არჩევნების პირველი ტურის საბოლოო შედეგებს სრულად შეგიძლიათ გაეცნოთ ამ ბმულზე.