სერგო თეთრაძის ცოლი: ბედნიერად ვიყავით, სანამ ჩვენ სახლში ნაციონალები არ მოვიდნენ

თბილისში აქცია „არა ნაცებს“ იმართება. ნაციონალური მოძრაობის პრეზიდენტობის კანდიდატის, გრიგოლ ვაშაძის, წინააღმდეგ პატრიოტთა ალიანსის მიერ ორგანიზებული აქცია, რომელზეც სიტყვით წინა ხელისუფლების დროს დაზარალებული მოქალაქეები გამოდიან. მათ შორის, აქციის მონაწილეებს მიმართა პოლკოვნიკ სერგო თეთრაძის მეუღლემ ნანა თეთრაძემაც. მის განცხადებას სააგენტო "ინტერპრესნიუსი" ავრცელებს.

ნანა თეთრაძემ ხალხს მოუწოდა, რომ არჩევანი "ნაციონალური მოძრაობის" წინააღმდეგ გააკეთოს. მისი თქმით, პოლკოვნიკ სერგო თეთრაძეს სიმართლის დამტკიცება სიცოცხლის ფასად მოუწია.

"ვიყავით ძალიან ბედნიერი ოჯახი, სანამ ერთ დღეს ჩვენთან სახლში არ მოვიდნენ და ეს ბედნიერება არ დაარბიეს. წაგვართვეს ოცნება და იმედები და ამის შემდეგ 7 წელია დავდივართ მე და ჩემი შვილი სასამართლოებში და ჩვენს სიმართლეს ვამტკიცებთ. ჩემი მეუღლე იყო დასახიჩრებული. ეს წამების გზა გაიარა იმის გამო, რომ თავის ღირსებას იცავდა. ის დასახიჩრებული სხეული ახლაც თვალწინ მიდგას. მე არ მინდა საქართველოში განმეორდეს ისეთი ქმედებები, რასაც სერგო თეთრაძე და უამრავი ადამიანი შეეწირა”, - აღნიშნა სერგო თეთრაძის ცოლმა.

პატრიოტთა ალიანსის ლიდერის ირმა ინაშვილის თქმით, „ქართულმა ოცნებამ“ უნდა შეწყვიტოს „ნაციონალური მოძრაობის“ პოლიტიკურ ოპონენტებად დასახელება და შეწყვიტოს მათთან კოჰაბიტაცია. 

23 ნოემბერს,  „არა ნაცებს“ - ამ სახელწოდებით „პატრიონთა ალიანსმა“ ბათუმში აქცია გამართა.  მათ "ნაციონალური მოძრაობის" მმართველობის პერიოდი გაიხსენეს და განაცხადეს, რომ არ დაუშვებენ ძალადობრივი რეჟიმის დაბრუნებას.

თადარიგის პოლკოვნიკი სერგო თეთრაძე და კიდევ სამი პირი – დავით ლონდარიძე, გია გორელაშვილი და სერგეი ჩაპლიგინი ჯაშუშობის ბრალდებით 2011 წლის სექტემბერში დააკავეს. დაკავებიდან ერთ კვირაში თეთრაძე ციხეში გარდაიცვალა. 14 ნოემბერს თბილისის სააპელაციო სასამართლომ სერგო თეთრაძის საქმეზე ბაჩო ახალაიას განაჩენი ძალაში დატოვა.

საპრეზიდენტო არჩევნების მეორე ტური 28 ნოემბერს გაიმართება.

პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

2018 წლის საპრეზიდენტო არჩევნების პირველი ტურის საბოლოო შედეგებს სრულად შეგიძლიათ გაეცნოთ ამ ბმულზე.