სამართლიანი არჩევნების წარმომადგენლებმა საუბნო კომისიებში 10, ხოლო საოლქო კომისიებში 5 საჩივარი დაწერეს

11 საათისთვის არასამთავრობო ორგანიზაცია „სამართლიანი არჩევნების" წარმომადგენლებმა საუბნო კომისიებში 10, ხოლო საოლქო კომისიებში 5 საჩივარი დაწერეს. ორგანიზაციის ხელმძღვანელის მიხეილ ბენიძის თქმით, გამოვლინდა ხმის მიცემის ფარულობის დარღვევის რამდენიმე შემთხვევა. ხმის მიცემის ფარულობის დარღვევა დაფიქსირდა შემდეგ უბნებზე:

გურჯაანის მე-12 საარჩევნო ოლქის 26-ე საარჩევნო უბანზე „ქართული ოცნების“ წარმომადგენლები: ლელა შანყულაშვილი და ზურაბ ხანდამაშვილი (მერის ძმა) საარჩევნო კაბინიდან გამოსულ ამომრჩევლებს უმოწმებენ, საარჩევნო ბიულეტენში თუ რომელი კანდიდატი აქვთ შემოხაზული.

ამ ფაქტის გაპროტესტების შემდეგ „ერთიანი ნაციონალური მოძრაობის“ წარმომადგენელი უბნიდან გააძევეს. ეს პირები ასევე ერევიან საუბნო კომისიის საქმიანობაში და კომისიის თავმჯდომარეს აძლევენ კონკრეტულ მითითებებს. 

გურჯაანის მე-12 საარჩევნო ოლქის 43-ე საარჩევნო უბანზე ამომრჩევლები ხმას აძლევენ საარჩევნო კაბინაში შეუსვლელად, ხოლო იმ ამომრჩევლებს, რომლებიც კაბინაში აძლევენ ხმას, საარჩევნო ბიულეტენები გამოაქვთ ისე, რომ შესაძლებელია გაირკვეს, თუ ვის მისცეს ხმა.

ტყიბულის 57-ე საარჩევნო ოლქის მე-2 საარჩევნო უბანზე ამომრჩეველმა ხმა მისცა საარჩევნო კაბინის გარეთ.

მიხეილ ბენიძის თქმით, იყო შემთხვევა, როდესაც უბანზე არაუფლებამოსილი პირი იმყოფებოდა.

წყალტუბოს  58-ე საარჩევნო ოლქის 55-ე საარჩევნო უბანზე იმყოფებოდა პოლიციელი (ფორმით), რომელიც არ იყო ამომრჩეველი და არ ჰქონდა უბანზე ყოფნის უფლება. ეს პირი უბნის ტერიტორიაზე მობილური ტელეფონით იღებდა ფოტოებს. „სამართლიანი არჩევნების“ დამკვირვებლის მითითებით, პოლიციელმა შეწყვიტა ფოტოების გადაღება და დატოვა უბანი. მოცემულ ფაქტზე კომისიის თავმჯდომარეს არ მოუხდენია რეაგირება.

სამართლიანი არჩევნების ხელმძღვანელი კიდევ რამდენიმე დარღვევაზე საუბრობს, როგორიცაა დამკვირვებლის უფლების შეზღუდვა. 

ლანჩხუთის 61-ე საარჩევნო ოლქის მე-20 საარჩევნო უბანზე და ხულოს 84-ე საარჩევნო ოლქის მე-13 საარჩევნო უბანზე დამკვირვებლებს გარკვეული დროის განმავლობაში პრობლემა შეექმნათ, ვინაიდან კომისიის განცხადებით მათ აკრედიტაციას ვადა ჰქონდა გასული. „სამართლიანი არჩევნების“ მიერ საოლქო საარჩევნო კომისიისთვის მიმართვის შემდეგ პრობლემა აღმოიფხვრა.

დმანისის 24-ე საარჩევნო ოლქის 30-ე საარჩევნო უბანი 20 წუთის დაგვიანებით გაიხსნა, რადგან უბანზე არ ჰქონდათ ბეჭდის მელანი.

ყვარლის 16-ე საარჩევნო ოლქის 14-ე საარჩევნო უბანზე საკონტროლო ფურცელი პირველი ამომრჩევლის მოსვლამდე მოათავსეს საარჩევნო ყუთში.

ქობულეთის 81-ე საარჩევნო ოლქის 3-ე, მე-11 და 62-ე საარჩევნო უბნებზე „ერთიანი ნაციონალური მოძრაობისა“ და „ევროპული საქართველოს“ მიერ დანიშნულმა კომისიის წევრებმა უარი თქვეს გადასატანი ყუთის გამყოლი კომისიის წევრების შესარჩევ წილისყრაში მონაწილეობაზე.

ჩხოროწყუს 69-ე საარჩევნო ოლქის მე-2 საარჩევნო უბანზე კომისიის წევრმა უარი განაცხადა გადასატანი ყუთის გამყოლი კომისიის წევრის შერჩევის წილისყრაში მონაწილეობაზე.

ბათუმის 79-ე საარჩევნო ოლქის 25-ე საარჩევნო უბანზე კომისიის თავმჯდომარემ ერთ-ერთ კომისიის წევრს წილისყრაში არ მიაღებინა მონაწილეობა, რაზეც ეს უკანასკნელიც დაეთანხმა.

ზუგდიდის 67 -ე საარჩევნო ოლქის 59-ე საარჩევნო უბანზე „პატრიოტთა ალიანსის“ მიერ დანიშნულმა კომისიის წევრმა უარი განაცხადა ნებისმიერი სახის ფუნქციის შესრულებაზე.

კასპის 30-ე საარჩევნო ოლქის მე-5 საარჩევნო უბანზე კომისიის წევრმა ორსულობის გამო უარი განაცხადა წილისყრით მინიჭებული ნაკადის მომწესრიგებლის ფუნქციის შესრულებაზე და მას რეგისტრატორის ფუნქციის შესრულება დაეკისრა წილისყრის გარეშე.

ზუგდიდის 67-ე საარჩევნო ოლქის 51-ე საარჩევნო უბანზე შემოსულმა პირმა, რომელსაც ჰქონდა აკრედიტაციას, შესაბამისი წესით რეგისტრაცია გაიარა.

საპრეზიდენტო არჩევნებისთვის 73 საარჩევნო ოლქში გახსნილია 3 637 და გამონაკლის შემთხვევაში შექმნილი 11 საარჩევნო უბანი. საზღვრებს გარეთ გახსნილი უბნების რაოდენობა 55-ია. არჩევნების მეორე ტურისთვის ამომრჩეველთა საერთო რაოდენობაა 3 528 658.

28 ნოემბერი, საპრეზიდენტო არჩევნების მეორე ტური საქართველოში უქმე დღეა.

2018 წლის საპრეზიდენტო არჩევნების მეორე ტურის საბოლოო შედეგებს შეგიძლიათ გაეცნოთ ამ ბმულზე.