დმანისის გამგებელი: კახა ოქრიაშვილი და მისი გუნდი დამოუკიდებელ კანდიდატებზე ზეწოლას ახდენს

დმანისის მოქმედი გამგებელი, “ქართული ოცნების” წევრი გოგი ბარბაქაძე, რომელიც თვითმმართველობის არჩევნებში მერობის დამოუკიდებელ კანდიდატად დარეგისტრირდა, აცხადებს, რომ პარლამენტარი კახა ოქრიაშვილი მასზე და სხვა დამოუკიდებელ კანდიდატებზე ზეწოლას ახდენს. ამის შესახებ ინფორმაციას droa.ge ავრცელებს.

დმანისის გამგებელი ამბობს, რომ ოქრიაშვილი და მისი გუნდი მას და სხვა კანდიდატებს, რომლებიც დღემდე “ქართული ოცნების” წევრები არიან, მაგრამ არჩევნებში მონაწილეობა დამოუკიდებლად გადაწყვიტეს, კანდიდატურის მოხსნას აიძულებს. ის ამბობს, რომ რამდენიმე კანდიდატს ოქრიაშვილის ნათესავები სახლში მიუვარდნენ, რის შემდეგაც რამდენიმე მათგანი იძულებული გახდა, კანდიდატურა მოეხსნა. ბარბაქაძის თქმით, კანდიდატებს კენჭისყრაზე უარი ოქრიაშვილის ბიძაშვილმა, მერაბ ოქრიაშვილმა ათქმევინა. 

გოგი ბარბაქაძემ ფაქტების შესასწავლად უწყებათაშორის კომისიასაც მიმართა. კომისიამ კი ბარბაქაძის განცხადება პროკურატურას გადაუგზავნა. ბარბაქაძე, ასევე, აპირებს, ინფორმაცია მიაწოდოს ადგილობრივ და საერთაშორისო სადამკვირვებლო ორგანიზაციებს.

"კახა ოქრიაშვილის ბიძაშვილმა მერაბ ოქრიაშვილმა, რომელიც 2012 წლის არჩევნებზე “ნაციონალების” სახელით გვატერორებდა “ქართული ოცნების” წევრებს, გვივარდებოდა სახლებში და ოფისებში. კანდიდატურები მოახსნევინეს, მაგალითად, კარაბულახის თემის წარმომადგენელს, ზულფუგარ მიქაელოვს, ოროზმანის თემის წარმომადგენელს, ქამრან ხიდიროვს, ამამლოს თემის წარმომადგენელს ფაიკ რუსტამოვს. მან გუშინ მოხსნა კანდიდატურა. ღამით სახლში მიუცვივდნენ და კანდიდატურის მოხსნა მოსთხოვეს. გუშინ დილით ის საოლქო კომისიაში მერაბ ოქრიაშვილმა თავისი მანქანით წაიყვანა და განცხადება დააწერინა. კანდიდატურის მოხსნის შემდეგ მას მოსთხოვეს, რომ “ქართული ოცნებიდან” ეყარა კენჭი, მაგრამ მან უარი თქვა. ზეწოლა იყო, ასევე, სარკინეთის თემის წარმომადგენელზე, ომარ გოგოჭურზე, რომელთანაც მივიდნენ და უთხრეს, რომ უშიშროების დავალებით იყვნენ მისულები და კანდიდატურის მოხსნა მოსთხოვეს, თუმცა, მან არ მოხსნა კანდიდატურა. ყველა ეს ადამიანი, რომელიც მე ჩამოვთვალე, “ქართული ოცნების” წევრია დღემდე, მათ შორის, ნაწილი საკრებულოს მოქმედი წევრები არიან, მაგრამ მათ, ისევე, როგორც მე, დამოუკიდებლად კენჭისყრა იმიტომ გადაწყვიტეს, რომ დმანისში “ქართული ოცნება” ოქრიაშვილის ოცნებამ ჩაანაცვლა", - ამბობს გოგი ბარბაქაძე.

ბარბაქაძის განცხადებით, ის მოწმის სახით დაკითხვაზე უკვე იმყოფებოდა, სადაც პოლიტიკური დევნის შესახებ ილაპარაკა.

"ოქრიაშვილი ღიად დამემუქრა, რომ ყველაფერს გააკეთებს, რომ მე კენჭი არ ვიყარო. გამგეობის წინ ყვიროდა, რომ გამგებელს დააჭერინებს. პარტიამ სხვა სამსახურიც შემომთავაზა, მაგრამ უარი ვთქვი. მე მერობაზე არ მაქვს ამბიცია, მე ამბიცია ღირსებაზე მაქვს", - განაცხად ბარბაქაძემ.