აუდიტის სამსახურში დღეს "ევროპული საქართველოს" კიდევ ერთი შემწირველი გამოკითხეს

აუდიტის სამსახურში დღეს "ევროპული საქართველოს" კიდევ ერთი შემწირველი გამოკითხეს. ნინო ჩაჩუამ ოპოზიციურ პარტიას, სხვა შემწირველების მსგავსად, 5 ათასი ლარი გადაურიცხა. მისი განმარტებით, გადარიცხული თანხის ოდენობა მის შემოსავალს არ აღემატება.

ფინანსური მონიტორინგს სამსახურს დღეს 4 შემწირველი უნდა გამოეკითხა, თუმცა სამს იურიდიულ მისამართზე გამოკითხვის ოქმები არ ჩაჰბარდა. აუდიტის სამსახურში აცხადებენ, რომ გამოკითხვა ხვალიდან განახლდება.

პოლიტიკური პარტიების ფინანსური საქმიანობის მონიტორინგის სამსახურის უფროსის - ზურაბ აზნაურაშვილის თქმით, პროცესი მიმდინარე კვირის ბოლომდე გაგრძელდება, რადგან რამდენიმე პირმა პროცესის გადადება მოითხოვა. 

18 სექტემბერს, აუდიტის სამსახურმა  "ევროპული საქართველოს“ ორი წევრი გიორგი მაკასარაშვილი და მარიამ რამინაშვილი გამოკითხა. მათ პარტიას 5 ათასს - 5 ათასი ლარი შესწირეს.

სახელმწიფო აუდიტის სამსახურმა „ქართული ოცნებისა“ და „ევროპული საქართველოს“ შემომწირველების გამოკითხვა 18 სექტემბერს დაიწყო. გამოკითხვაზე ჯამში სულ 14 შემომწირველია დაბარებული. 

აუდიტის სამსახურის ინფორმაციით, 1 ივლისიდან 12 სექტემბრის ჩათვლით, „ქართულ ოცნებას“ 7 მილიონ ლარზე მეტი, „ევროპულ საქართველოს“ - 323 675 ლარი, ხოლო „ნაციონალურ მოძრაობას” - 5 432 ლარი შესწირეს. მთლიანობაში, აღნიშნულ პერიოდში პარტიებს შემოწირულობის სახით მიღებული აქვთ 7 26.993 ლარი. 

საქართველოში ადგილობრივი თვითმმართველობის არჩევნები 21 ოქტომბერს გაიმართება.