უსუფაშვილმა გორში მერობის და მაჟორიტარობის კანდიდატები წარადგინა

დავით უსუფაშვილი გორში საკუთარი გუნდის გამარჯვებაში დარწმუნებულია. „შენების მოძრაობის“ ლიდერმა დღეს გორში მერობისა და საკრებულოს თავმჯდომარეობის კანდიდატები წარადგინა.

მერობისთვის გორის მუნიციპალიტეტის მოქმედი გამგებელი დავით ონიაშვილი იბრძოლებს, საკრებულოს თავმჯდომარეობის კანდიდატი და სიის პირველი ნომერი კი ტელეკომპანია „თრიალეთის“ ხელმძღვანელი და ერთ-ერთი მფლობელი ბადრი ნანეტაშვილია.

წარდგენის შემდეგ, „ქართული ოცნების“ წევრმა ირმა პაპიძემ პარტიის დატოვების შესახებ გააკეთა განცხადება. პაპიძის თქმით, „ქართული ოცნება“ „ნაციონალურ მოძრაობად“ გადაიქცა და ამიტომ ის უერთდება „შენების მოძრაობას“.

მისივე თქმით, მასთან ერთად პარტიის რიგები კიდევ 50-მდე წევრმა დატოვა, თუმცა განცხადებებს უკვე ყოფილი წევრები ეტაპობრივად გააკეთებენ. პაპიძე გორის მუნიციპალიტეტის გამგეობის ადმინისტრაციის უფროსია.

„შესაცვლელია ბევრი რამ, მათ შორის თვითმმართველობის მიმართ დამოკიდებულება, ჩვენი დევიზია ჯერ პროგრამა და მერე ხელისუფლება. ჩვენ წარვადგინეთ ის ადამიანები, ვინც წლების განმავლობაში საქმეს რეალურად აკეთებდა“, - განაცხადა უსუფაშვილმა. 

საქართველოში თვითმმართველობის არჩევნები 21 ოქტომბერს გაიმართება.