ზუგდიდში ევროპული საქართველოს ბანერის ჩამოხევაზე გამოძიება დაიწყო

შს სამინისტრომ ევროპული საქართველოს ზუგდიდის ოფისში საარჩევნო ბანერის ჩამოხევის ფაქტზე გამოძიება სს კოდექსისს 187-ე მუხლით დაიწყო, რაც ნივთის დაზიანებას ან განადგურებას გულისხმობს.

ოპოზიციური პარტიის ადგილობრივი ორგანიზაციის ოფისში ბანერი წუხელ ჩამოგლიჯეს.

ევროპული საქართველო ამ ფაქტს ქართულ ოცნებას უკავშირებს. მათი ინფორმაციით, მმართველი პარტიის საარჩევნო შტაბიდან რამდენიმეკაციანი ჯგუფი გამოვიდა, რომელმაც ზუგდიდის ცენტრალური ბაზრის შესასვლელთან ოპოზიციური პარტიის პლაკატები ჩამოხია.

პარტიაში ვარაუდობენ, რომ ეს ის ადამიანები არიან, ვინც მათ ოფისთან სარეკლამო ბანერი ჩამოგლიჯეს. ზუგდიდის მერობის კანდიდატის ლელა ქებურიას თქმით, პოლიტიკური ნების არსებობის შემთხვევაში, საქმის გამოძიება ვიდეო კამერების ჩანაწერების საშუალებით, მარტივადაა შესაძლებელი.

პლაკატების ჩამოხევას მმართველ ძალას უკავშირებენ ენმ-შიც. პარტიის ზუგდიდის ორგანიზაციის თავმჯდომარის ანი წითლიძის მტკიცებით, საარჩევნო პლაკატები ქართული ოცნების ახალგაზრდული ფრთის წევრებმა ჩამოხიეს. მისივე თქმით, ამ პირებს წარწერით „ქართული ოცნება“ პირბადეები ეკეთათ და თვითმხილველებმა ერთ-ერთი მათგანი სახეზე იცნეს. 

ამ ბრალდებებს კატეგორიულად უარყოფენ ქართულ ოცნებაში და ამბობენ, რომ  მსგავსი დავალებები ახალგაზრდულ ფრთას შტაბიდან არ მიუღია და მმართველი ძალა მსგავსი მეთოდებით არ მოქმედებს. მათივე შეფასებით, პლაკატების ჩამოხევა ვანდალიზმია და ქართული ოცნების პლაკატებიც ჩამოხეულია.

ზუგდიდში, რუსთაველის 84 ნომერში მდებარე "ევროპული საქართველოს" ოფისში პარტიის სარეკლამო ბანერი ჩამოგლიჯეს. 

საქართველოში თვითმმართველობის არჩევნები 21 ოქტომბერს გაიმართება.