„ავიატორი +“ ყაზბეგში მომხდარი ავიაკატასტროფის მიზეზებს დამოუკიდებლად იკვლევს

„ავიატორი +“ ყაზბეგში მომხდარი ავიაკატასტროფის მიზეზებს დამოუკიდებლად იკვლევს. „ჩვენი მიზანია დაჩქარდეს ტრაგედიის გამომწვევი მიზეზების დადგენა“ - ნათქვამია განცხადებაში, რომელიც კომპანიამ 6 ივნისს სტეფანწმინდაში მომხდარი ტრაგიკული შემთხვევის თაობაზე გაავრცელა. 

„შპს „ავიატორი +“ ღრმა მწუხარებას გამოხატავს 6 ივნისს სტეფანწმინდაში მომხდარი ტრაგიკული შემთხვევის თაობაზე. კომპანიის მენეჯმენტი თანაუგრძნობს გარდაცვლილთა ოჯახებსა და ახლობლებს და მათ გვერდით დგას ამ მძიმე წუთებში“ - ნათქვამია კომპანიის განცხადებაში. 

„6 ივნისს მომხდარ ტრაგიკულ შემთხვევასთან დაკავშირებით გაცნობებთ, რომ პილოტის მიერ საფრენოსნო გეგმა საქართველოს კანონმდებლობით გათვალისწინებული წესით გადაეცა სამოქალაქო ავიაციის სააგენტოს. ბორტზე პილოტის გარდა იმყოფებოდნენ “ავიატორი +ის” ფრენების კოორდინატორი და სასტუმრო “რუმსის” თანამშრომელი - შვეიცარი. თავისი სურვილისამებრ ნებისმიერ ადამიანს, მათ შორის სასტუმროს თანამშრომელს, აქვს უფლება პილოტთან ერთად შეასრულოს არაკომერციული რეისი“ - ნათქვამია კომპანიის განცხადებაში. 

შპს „ავიატორი +“-ის ცნობით, უბედური შემთხვევის შედეგად გარდაცვლილი პილოტი ილიკო ბაიდაშვილი მაღალკვალიფიციური სამხედრო მფრინავი იყო 20 წელზე მეტი ხნის პროფესიული გამოცდილებით. პილოტი ფლობდა ავიაკომპანიის სატრანსპორტო პილოტის მოწმობას (ATPL) და გავლილი ქონდა საფრენოსნო წვრთნები და სწავლებები ამერიკის შეერთებულ შტატებსა და კანადაში.

„ავიატორი +“ „სამოქალაქო ავიაციის სააგენტოს“ მიერ გაცემული საჰაერო ხომალდების ექსპლუატანტის სერთიფიკატის მფლობელი კომპანია. იგი ასევე ფლობს კომერციული გადაყვანა-გადაზიდვის მოწმობას.
ვერტმფრენი მუდმივად გადიოდა ტექნიკურ დათვალიერებას სამოქალაქო ავიაციის სააგენტოსთან შეთანხმებული თვითმფრინავის ტექნიკური მომსახურების პროგრამის (AMP) შესაბამისად. ვერტმფრენმა ბოლო ტექნიკური შემოწმება გაიარა 2019 წლის 22 მაისს.

კომპანიის მენეჯმენტის ინფორმაციიტ, „ავიატორი + ის” მთავარი მიზანია, რაც შეიძლება მოკლე დროში, დადგინდეს ტრაგიკული მოვლენის რეალური მიზეზი:

„კომპანია თავის მხრივ დამოუკიდებლად ახორციელებს ფაქტების მოკვლევას საგამოძიებო ორგანოებთან კოორდინაციით, რათა დაჩქარდეს ტრაგედიის გამომწვევი მიზეზების დადგენა. ამავე დროს კომპანია აქტიურ კომუნიკაციაშია მწარმოებელთან და იგეგმება მათი წარმომადგენლების ვიზიტი უახლოეს მომავალში“ -ნათქვამია კომპანიის განცხადებაში. 

დაბა სტეფანწმინდაში მდებარე სასტუმროს, „რუმს ჰოტელ ყაზბეგი“-ს კუთვნილი ვერტმფრენი ყუროს მთასთან, დაუსახლებელ ადგილზე 6 ივნისს ჩამოვარდა.