მცირეწლოვნის დაჭრაში ბრალდებულის დედა: ჩემს შვილს ფსიქიკური პრობლემები აქვს და მკურნალობდა

პეკინის გამზირზე, ბავშვის დაჭრის საქმეზე დაკავებულის დედა ადასტურებს, რომ მის შვილს დანა ნამდვილად ჰქონდა და ეს დანა სავარაუდოდ, სახლიდან წაიღო.

მისივე თქმით, ბრალდებული ფსიქიატრიულ კლინიკაში რამდენჯერმე მკურნალობდა. დაკავებულის დედის განმარტებით, ახლა ექსპერტიზამ უნდა დაადგინოს, აქვს თუ არა საძაგლიშვილს ჯანმრთელობის პრობლემები და გამოძიებაც ამის მიხედვით უნდა გაგრძელდეს.

„დანა თუ არ ჰქონდა, როგორ დააზიანებდა? ესე იგი დანა ჰქონდა. ჩემს შვილს რადგანაც აქვს ფსიქიკური პრობლემები, ახლა სასამართლომ გადაწყვიტა, რომ ექსპერტიზა უნდა ჩატარდეს. რა თქმა უნდა, დადასტურდება ჯანმრთელობის პრობლემები და ამის მიხედვით იმსჯელებენ შემდეგ. მკურნალობდა და ფსიქიატრიულში იწვა“, - განაცხადა მანანა ჩხიკვაძემ.

ადვოკატი კი მიიჩნევს, რომ საქმეზე გამოძიება უნდა შეწყდეს, ბრალდებული პატიმრობიდან გათავისუფლდეს და იძულებითი მკურნალობა დაენიშნოს. „ამ ეტაპზე არაფერს მოვითხოვთ. სასამართლო მაინც ობიექტურად მოიქცა, ვინაიდან საქმეზე შეკრებილი მტკიცებულებები არ იძლეოდა იმის საშუალებას, რომ თავისუფლებაზე დაეტოვებინა ბრალდებული. მაგრამ დანიშნულია სასამართლო-ფსიქიატრიული ექსპერტიზა, სხვა საგამოძიებო მოქმედებები და შესაბამისად, ვფიქრობთ, რომ ამ საქმეზე თამარ საძაგლიშვილზე სისხლის სამართლებრივი დევნა შეწყდება“, - განაცხადა ადვოკატმა ალექსანდრე გაბუნიამ.

მოსამართლემ დღეს პროკურატურის შუამდგომლობა დააკმაყოფილა და ბრალდებულ ქალს აღკვეთის ღონისძიების სახით პატიმრობა შეუფარდა.

პეკინის გამზირზე დაჭრილი ბავშვი საავადმყოფოდან 29 აგვისტოს გაწერეს. პოლიციამ 3 წლის ბავშვის დაჭრაში ბრალდებული 28 აგვისტოს დააკავა. დანაშაული 7-დან 10 წლამდე ვადით თავისუფლების აღკვეთას ითვალისწინებს. მცირეწლოვანს ბასრი საგნით დაზიანებები 27 აგვისტოს საღამოს მიაყენეს.