„იმედის“ გადამღები ჯგუფი ზემო ფონიჭალაში მომხდარ ინციდენტთან დაკავშირებით გამოკითხეს

ტელეკომპანია „იმედის“ გადამღები ჯგუფი, რომელსაც ნიკოლოზ მაქარაშვილის მიმდევრები ფიზიკურად გაუსწორდნენ, წუხელ პოლიციის სამმართველოში გამოკითხეს. სამართალდამცველებმა ვარლამ წიკლაურისა და კახა როინიშვილისგან მომხდარის დეტალები პირადად მოისმინეს.

მათთან ერთად გამოიკითხნენ გადაცემა „იმედის კვირის“ ჟურნალისტები - ელენე ცინცაძე და თაკო მერაბიშვილიც, რომლებიც ზემო ფონიჭალაში თავდასხმის უშუალო თვითმხილველები არიან. 

ზემო ფონიჭალაში „იმედის კვირის“ რეპორტაჟის მოსამზადებლად მისულ „იმედის“ გადამღებ ჯგუფს აგრესიით შეხვდნენ, მუშაობის შესაძლებლობა არ მისცეს და ფიზიკურად გაუსწორდნენ. დაშავებული ჟურნალისტი და ოპერატორი სასწრაფო დახმარების ექიმებმა კლინიკაში გადაიყვანეს.

შინაგან საქმეთა სამინისტრომ ფონიჭალაში, ერთ-ერთ საცხოვრებელ კორპუსთან მომხდარ ინციდენტზე გამოძიება დაიწყო.

შსს-ს ცნობით, გამოძიება საქართველოს სისხლის სამართლის კოდექსის 126-ე, 154-ე და 187-ე მუხლებით მიმდინარეობს, რაც ძალადობას, ჟურნალისტისათვის პროფესიულ საქმიანობაში უკანონოდ ხელის შეშლას და ნივთის დაზიანებას ან განადგურებას გულისხმობს.