ოთარ აბესაძე გულის შეტევით კლინიკაში გადაიყვანეს

თბილისის მერიის თანამშრომელი ოთარ აბესაძე გულის შეტევით ჩაფიძის კლინიკაშია გადაყვანილი – ამის შესახებ ადვოკატმა ლილი გელაშვილმა განაცხადა. მისი თქმით, აბესაძე კლინიკაში სასჯელაღრულების დაწესებულებიდან გადაიყვანეს. ინფორმაციას 1tv ავრცელებს.

„დღეს ის პროცესზე ცუდად გახდა, გული წაუვიდა და სიცოცხლე ბადრაგმა შეუნარჩუნა. სასწრაფო გამოიძახეს. ამის შემდეგ, აბესაძე სასჯელაღსრულების დაწესებულებაში გადაიყვანეს. იქ ის ცუდად გახდა და ახლა გადაიყვანეს ჩაფიძეში. იქ მივდივართ, ყველამ უნდა აიღოს პასუხისმგებლობა, ვინც აბესაძეს ასე ექცევა. ჩვენ აქამდე მის ჯანმრთელობაზე ღიად არ ვსაუბრობდით და ზოგადად ვამბობდით, მაგრამ ახლა გავიგებთ ყველა დეტალს“, – აცხადებს ადვოკატი.

მანამდე მოსამართლემ არ მიიჩნია ექსპერტიზის დასკვნა საკმარის არგუმენტად იმისთვის, რომ აბესაძისთვის შეფარდებული აღკვეთის ღონისძიება შეეცვალა.

მისი თქმით, დასკვნაში არ იყო მითითებული ისეთი გარემოება, რომლითაც გაირკვეოდა, რომ ოთარ აბესაძის ჯანმრთელობის მდგომარეობა შეუთავსებელია მის სასჯელაღსრულების დაწესებულებაში ყოფნასთან.

"აქედან გამომდინარე, მოსამართლემ არ გაიზიარა დაცვის მხარის შუამდგომლობა და შეფარდებული აღკვეთის ღონისძიება ძალაში დატოვა", - განაცხადა პროკურორმა.

რაც შეეხება ბრალდებულის შეუძლოდ გახდომას, პროკურორის ინფორმაციით, ოთარ აბესაძის ჯანმრთელობის მდგომარეობის გამო პროცესი ცოტა ხნით შეწყდა, თუმცა შუამდგომლობების განხილვა მხარეებმა მოგვიანებით კვლავ განაგრძეს.

ოთარ აბესაძე 1 დეკემბერს სამხარაულის სასამართლო ექსპერტიზის ბიუროში გადაიყვანეს და ორი კვირის განმავლობაში მას გამოკვლევები ჩაუტარდა. ასეთი გადაწყვეტილება მოსამართლემ ადვოკატის მოთხოვნის საფუძველზე 30 ნოემბერს მიიღო.

ქრთამის აღების ბრალდებით სახელმწიფო უსაფრთხოების სამსახურმა თბილისის მერიის ყოფილი თანამშრომელი ოთარ აბესაძე 12 ივლისს დააკავა, ხოლო ბრალი 13 ივლისს წაუყენა. 14 ივლისს თბილისის საქალაქო სასამართლომ აბესაძეს წინასწარი პატიმრობა შეუფარდა.

საბრალდებო დასკვნის მიხედვით, ოთარ აბესაძე მოქალაქეებს მდინარე მტკვარზე, ტივზე კაფეს მოწყობის ნებართვების დაჩქარებული წესით აღებას დაჰპირდა, რის სანაცვლოდ ქრთამი - 3 000 აშშ დოლარი - მოითხოვა.