გამომძიებელი: ხორავას ქუჩაზე ფარდული მოსახლეობამ გაუფრთხილებლად მოშალა

მოზარდების მკვლელობის საქმეზე შექმნილი პარლამენტის დროებითი საგამოძიებო კომისიის სხდომაზე საქმის პროკურორმა, ზვიად ფხაკაძემ განაცხადა ინფორმაცია, რომ ინციდენტში მონაწილეობდა სუბელიანის შვილიც, ეს უშუალოდ დაკითხვის დროს, ან დაკითხვამდე ნახევარი საათით ადრე შეიტყო.

"თავად მირზასთან მე არანაირი კონტაქტი არ მქონია. ვნახე, რომ იკითხებოდა მამასთან ერთად, თუმცა კომუნიკაცია არ მქონია“, - განაცხადა ფხაკაძემ. 

ხორავას ქუჩაზე მომხდარი მკვლელობის ფაქტის შემსწავლელი დროებითი საგამოძიებო კომისიის წევრი ოთარ კახიძე დაინტერესდა, თუ რატომ არ მოხდა ყველა უბნიდან სისხლის ნიმუშების აღება.

„შემთხვევის ადგილის დათვალიერების ოქმიდან როგორც ჩანს, არ არის აღებული ნიმუშები, დაზუსტებით არ ვიცით ეს სისხლია თუ არა. შეფერილობით სისხლს გავს. როგორც ზვიად ფხაკაძემ აღნიშნა, ეს სარალიძის სისხლია. საინტერესოა, რატომ არ მოხდა ნიმუშების აღება“, - განაცხადა ოთარ კახიძემ. 

„შესაბამისი ლოკაციებიდან სისხლის ნიმუშები აღებული იყო, რაც მნიშვნელოვანი იყო. თუმცა ის გარემოება, რომ სისხლის ყველა უბანი არ შემოწმებულა, პრობლემატურად არ ჩაითვალა, ვინაიდან პროცესზე მოწმეთა ჩვენებებით დადასტურდა, რომ ფარდულში მხოლოდ ერთი პირი იყო დაჭრილი დავით სარალიძე და მეორეს გ.მ-ს ჰქონდა დაზიანებები. სხვა პირთა დაზიანება რეალურად არ მომხდარა. ასევე იმ ლოკაციიდან აღებულია სისხლის ნიმუში რაც საკმარისად იქნა მიჩნეული“, -განაცხადა ზვიად ფხაკაძემ.

საუბარი შეეხო ფარდულსაც, სადაც მკვლელობა მოხდა.

ხორავას ქუჩაზე ფარდულის დემონტაჟის გადაწყვეტილება ადგილობრივმა მოსახლეობამ გამოძიებისგან დამოუკიდებლად მიიღო, – ამის შესახებ შინაგან საქმეთა სამინისტროს წარმომადგენელმა, კახა სირაძემ ხორავას ქუჩაზე მკვლელობის ფაქტის შემსწავლელი დროებითი საგამოძიებო კომისიის სხდომაზე განაცხადა.

საგამოძიებო კომისიის წევრმა ოთარ კახიძემ სხდომაზე დასვა კითხვა, თუ რატომ მოხდა იმ ფარდულის დემონტაჟი, სადაც დავით სარალიძემ სასიკვდილო ჭრილობები მიიღო და რატომ არ დაილუქა ის.

შსს-ს წარმომადგენლის, კახა სირაძის განმარტებით, ფარდულის დემონტაჟი მხოლოდ მას შემდეგ მოხდა, რაც რამდენიმე საგამოძიებო ექსპერიმენტი ჩატარდა.

„მოგეხსენებათ, რომ შემთხვევის ადგილი დაცულია იქამდე, ვიდრე შემთხვევის ადგილი თვალიერდება. დამთავრდა შემთხვევის ადგილის დათვალიერება, ამოღებული იყო ყველა შესაძლო კვალი, საგანი. გადაიღეს 400-მდე ფოტო. დემონტაჟი მოხდა მას შემდეგ, რაც რამდენიმე საგამოძიებო ექსპერიმენტი ჩატარდა. ფარდულის დემონტაჟის გადაწყვეტილება მიიღეს ადგილობრივმა მცხოვრებლებმა, ჩვენგან დამოუკიდებლად. საქმის კურსში არ ჩაუყენებივართ“,- აღნიშნა კახა სირაძემ.

სამ საათზე მეტია პარლამენტში დაძაბული კითხვა-პასუხის რეჟიმში, ხორავას ქუჩის საქმის პროკურორსა და შსს წარმომადგენელს უსმენენ.