გიორგი გიორგანაშვილი სტასბურგის სასამართლოს მიმართავს

მსახიობი გიორგი გიორგანაშვილი (ბახალა) აცხადებს, რომ ის ქართული სასამართლოს განაჩენს სტრასბურგში გაასაჩივრებს. ამის შესახებ ის Facebook-ის საკუთარ გვერდზე წერს.

„მე უნდობლობას ვუცხადებ ქართულ მართმსაჯულებას და მომიწევს ჩემი უდანაშაულობა ევროპულ სასამართლოში დავამტკიცო“, - აცხადებს გიორგანაშვილი მას შემდეგ, რაც მთელ თავის საქმეს მიმოიხილავს. ის მიიჩნევს, რომ მას სისტემა უსამართლოდ მოექცა და არც პოლიტიკურ მოტივებს გამორიცხავს.

„ჩემ მიმართ წამოწყებული ამ ბინძური კამპანიით, პოლიციური სისტემა შეეცადა საზოგადოებრივი აზრის მათ სასარგებლოდ ფორმირებას. მათ შორის იმ ადამიანებზე ცდილობდნენ გავლენის მოხდენას, ვინც ჩემს მიმართ გამოტანილი უკანონო განაჩენი გააპროტესტა. ამ „ახალი“ საქმით სისტემამ მათ უთხრა: ვის იცავთ? ადამიანს, რომელიც რეანიმობილით დაათრევს ამდენ ნარკოტიკს? და ბოდიშის მოხდაც კი მოითხოვეს საზოგადოებისგან, მაგრამ მაინც ყველაზე გულის ამრევი ის იყო, რომ ამ საქმით სცადეს პრეზიდენტის დისკრედიტაცია და პოლიტიკური დივიდენდების დაწერა, რაზეც მიუთითებს მმართველი პოლიტიკური პარტიის წარმომადგენლების და განსაკუთრებით რიგითი რუპორის, ვინმე ზარდიაშვილის არაერთი განცხადება, რომელიც ადასტურებს იმას, რომ ჩემს მიმართ არსებულ სისხლისსამართლებრივ დევნას საფუძვლად პოლიტიკური მოტივაცია უდევს“, - წერს გიორგანაშვილი.

მსახიობი 23 იანვარს, სასამართლო პროცესზე დიდი ოდენობით ნარკოტიკების მოხმარების მიზნით შეძენა-შენახვაში დამნაშავედ ცნეს და 8 წლით თავისუფლების აღკვეთა მიუსაჯეს. ის დარბაზშივე დააკავეს. 

გიორგი გიორგანაშვილი 2017 წლის 25 იანვარს აიყვანეს, ხოლო 14 ივლისს 20 000-ლარიანი გირაოს სანაცვლოდ გაათავისუფლეს. მსახიობს პროკურატურა განსაკუთრებით დიდი ოდენობით ნარკოტიკის მოხმარების მიზნით შეძენა-შენახვას ედავებოდა.

30 მარტს კი, შსს-ს მიერ გავრცელებული ინფორმაციით, დააკავეს დანაშაულებრივი ჯგუფის ორგანიზატორი, ირაკლი ქორიძე, რომელმაც თანამზრახველებთან ერთად დაგეგმა და ქვეყანაში უკანონოდ შემოიტანა განსაკუთრებით დიდი ოდენობით ნარკოტიკული საშუალება. 

დავით მათიკაშვილმა ქორიძის შესახებ „ქრონიკაში" ისაუბრა და თქვა, რომ ქორიძე 2011 წელსაც იყო დაკავებული, თუმცა 2014 წელს ის პრეზიდენტმა გიორგი მარგველაშვილმა შეიწყალა.

ახალი ბრალდების პარალელურად, სააპელაციო სასამართლოში გიორგანაშვილის ადვოკატმა წინა ინსტანციის გადაწყვეტილება გაასაჩივრა, თუმცა სააპელაციომ მსახიობი პატიმრობაში დატოვა.