„ომეგა ჯგუფი“ ყოფილ და მოქმედ მაღალჩინოსნებს ლონდონში უჩივის

"ომეგა ჯგუფმა" ლონდონის სასამართლოში საქართველოს მოქმედი და ყოფილი მაღალჩინოსნების წინააღმდეგ სამართლებრივი პროცედურა დაიწყო. ამის შესახებ "ომეგა ჯგუფის" ადვოკატმა კოლინ გიბსონმა თქვა. ინფორმაციას ტელეკომპანია "იბერია" და "რუსთავი 2" ავრცელებს.

ადვოკატის განცხადებით, როგორც საქართველოში, ისე დიდ ბრიტანეთში სასამართლო პროცესების დასაწყებად საკმარისი მტკიცებულებები არსებობს. 

"ჩვენი სარჩელის ფარგლებში, ბრალდებებს წარვუდგენთ ინგლისის უმაღლეს სასამართლოს. ქართველ მაღალჩინოსნებს მიეცემათ საშუალება თავად წარადგინონ თავიანთი მოსაზრებები მოსამართლის წინაშე ამის შემდეგ მიიღება გადაწყვეტილება", - თქვა "რუსთავი 2"-თან ინტერვიუში "ომეგა ჯგუფის" ადვოკატმა, იურიდიული კომპანია "ფილდფიშერის" იურისტმა კოლინ გიბსონმა.

"იბერიასთან" ინტერვიუში კი გიბსონმა განაცხადა, რომ სარჩელი დანაშაულში თანამონაწილეობის და კორუფციის ბრალდებით ლონდონში შემუშავდა. სარჩელში მოხსენიებულები არიან: გიორგი გახარია, ლევან ყიფიანი, ნოდარ ხადური, ანზორ ჩუბინიძე, დიმიტრი ქუმსიშვილი და ბიძინა ივანიშვილი. 

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო, ჩანაწერებზე ექსპერტიზის ჩატარება იგეგმება. 

პირველი ჩანაწერი რამდენიმე კვირის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.   

„ომეგა ჯგუფთან“ დაკავშირებული სავარაუდო კორუფციული სკანდალის ფარული ჩანაწერის ერთ-ერთი ფიგურანტია, კონკურენციის სააგენტოს ხელმძღვანელი ნოდარ ხადური. ის ჩანაწერს ცრუს უწოდებს და „ომეგას“ საქმესთან კავშირს კატეგორიულად უარყოფს.

პატივისა და ღირსების შელახვისთვის სამართლებრივ დავას აპირებს ეკონომიკის ყოფილი მინისტრი დიმიტრი ქუმსიშვილი.

"იბერიისა" და "ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

14 სექტემბერს სპორტის ყოფილმა მინისტრმა ლევან ყიფიანმა „საქართველოს რკინიგზის“ სამეთვალყურეო საბჭოს წევრის პოზიცია დატოვა. 17 სექტემბერს კი ის პროკურატურაში გამოკითხეს.