შეირაღებული ძალების გენერალური შტაბი განცხადებას ავრცელებს

საქართველოს შეირაღებული ძალების სახელით გენერალური შტაბის უფროსმა ვლადიმერ ჩაჩიბაიამ ვიდეომიმართვა გაავრცელა. 

"შეირაღებული ძალები არის პოლიტიკურად ნეიტრალური სახელმწიფოებრივი ინსტიტუტი, რომლის მთავარი მიზანია ქვეყნის სუვერენიტეტისა და დამოუკიდებლობის დაცვა. ეს ამოცანა გვავალდებულებს, ვიყოთ ერთიანი, კონსოლიდირებული და მზად გამოწვევებთან გასამკლავებლად. შესაბამისად, ქართული ჯარი ეკუთვნის საქართველოს თითოეულ მოქალაქეს და შედგება საზოგადოების წარმომადგენლებისაგან, განურჩევლად მათი ეთნიკური, რელიგიური თუ პოლიტიკური შეხედულებებისა.

ქვეყანაში მიმდინარე დემოკრატიული პროცესი, კონკრეტულად კი საპრეზიდენტო არჩევნები საქართველოს ყველა მოქალაქეს, მათ შორის შეიარაღებული ძალების წარმომადგენლებს, აძლევს სამოქალაქო უფლებას, რომ დააფიქსირონ საკუთარი არჩევანი და ამით გამოხატონ პოზიცია. 

კამპანიაში ჩართულ ადამიანებს, ყოფილ სამხედროებს მინდა მივმართო და მოვუწოდო, რომ შეიარაღებული ძალების გამოყენება პოლიტიკური მიზნებისათვის ეწინააღმდეგება შეიარაღებული ძალების და მთლიანად, ქვეყნის ინტერესებს. ნებისმიერი მცდელობა ჯარი ჩაითრიონ პოლიტიკურ პროცესში, არის სახიფათო და ანტისახელმწიფოებრივი ქმედება. 

შეიარაღებული ძალები, მის თითოეულ ჯარისკაცთან ერთად, კვლავ გააგრძელებს მიუკერძოებლად ქვეყნის სუვერენიტეტისა და უსაფრთხოების დაცვას", - განაცხადა გენერალური შტაბის ხელმძღვანელმა ვლადიმერ ჩაჩიბაიამ.

შეგახსენებთ, რომ მიხეილ სააკაშვილის მხარდამჭერმა ყოფილმა სამხედროებმა სოცქსელში "ქართული ოცნების" მიერ მხარდაჭერილი დამოუკიდებელი საპრეზიდენტო კანდიდატის, სალომე ზურაბიშვილის წინააღმდეგ კამპანიის წარმოება დაიწყეს. პოსტების მიხედვით მათთვის დამოუკიდებელი კანდიდატის განცხადებები მიუღებელია და საზოგადოებას მოუწოდებენ არ დაუჭირონ მას მხარი. 

რამდენიმე დღის წინ ყოფილმა სამხედრო მოსამსახურებმა მუხათგვერდის სასაფლაოზე აგვისტოს ომის დაწყებასთან დაკავშირებით ვიდეომიმართვა ჩაწერეს და მოწოდება გააკეთეს, რომ სალომე ზურაბიშვილს მხარი არ დაუჭირონ. გენერალმა დევი ჭანკოტაძემ მოსახლეობას მოუწოდა, არ მისცეს ხმა იმ პრეზიდენტს, რომელიც აგვისტოს ომის დაწყებას საქართველოს აბრალებს.

ამ ფაქტთან დაკავშირებით, თავდაცვის სამინისტრომ ყოფილ სამხედრო მოსამსახურეებს, მოქალაქეებსა და პოლიტიკური გაერთიანების წარმომადგენლებს მიმართა, რომ ნუ ეცდებიან ჩარიონ შეირაღებული ძალები პოლიტიკურ და საარჩევნო კამპანიაში.