ეკა გიგაური პროკურატურას ყალბი პირადობების დაბეჭდვაზე ინფორმატორს არ დაუსახელებს

„საერთაშორისო გამჭვირვალობა-საქართველოს“ აღმასრულებელი დირექტორი ეკა გიგაური არ აპირებს პროკურატურას მიაწოდოს იმ წყაროს შესახებ ინფორმაცია, რომელმაც არასათავრობო ორგანიზაციებს არჩევნების მეორე ტურისთვის ყალბი პირადობების დაბეჭდვის შესახებ განუცხადა. ინფორმაციას 1tv.ge ავრცელებს.

ამ წუთებში პროკურატურაში სწორედ ამ საკითხის შესახებ ეკა გიგაური და საიას აღმასრულებელი დირექტორი  ირმა პავლიაშვილი იკითხებიან.

"უნდა მივაწოდოთ ინფორმაცია, რაც გვაქვს ჩვენ განცხადებაში, რადგან ამაზე მეტი ინფორმაცია ჩვენ არ გაგვაჩნია. გუშინ განცხადებაში ვსაუბრობდით სახელებზე და გვარებზე, კონკრეტულ ადამიანებზე, რომლებიც სავარაუდოდ ამ დანაშაულში არიან ჩართულები, ასევე როდის და რა პირობებში, ამიტომ ეს საკმარისია, რათა  გამოძიება დაიწყოს და კონკრეტული შედეგები დადოს. ჩვენთვის ძალიან მნიშვნელოვანია, რომ მაშინვე დაიწყო გამოძიება, თუმცა ამის შემდეგ უკვე არ ვიცით, რა შედეგით დასრულდება გამოძიება. მნიშვნელოვანია, რომ ყველა კითხვას, რომელიც გვქონდა, გაეცეს პასუხი", - განაცხადა ეკა გიგაურმა პროკურატურაში შესვლამდე.

გიგაურის თქმით, კანონით წყაროს დასახელება არც ევალებათ და არც აპირებენ, რადგან ორგანიზაციები იცავენ ადამიანის უფლებებს. ამასთან, გიგაური ამბობს, რომ ვერც კონკრეტულ მტკიცებულებებს წარადგენენ, ვინაიდან არასამთავრობო საგამოძიებო ორგანო არ არის.

"რა ტიპის პირადობის მოწმობებზეა საუბარი, არის თუ არა ეს ყველაფერი მასობრივი ხასიათის, ეს ინფორმაცია ჩვენ არ გაგვივრცელებია  და შესაბამისად, არ ვიცით", -განაცხადა ეკა გიგაურმა.

„საერთაშორისო გამჭირვალობა - საქართველო“, „ახალგაზრდა იურისტთა ასოციაცია“ და „სამართლიანი არჩევნები“ არჩევნების შესაძლო გაყალბების ფაქტებზე საუბრობენ. არასამთავრობო ორგანიზაციების განცხადებით, გასულ კვირას სახელმწიფო სერვისების განვითარების სააგენტოში დასაქმებულმა ერთ-ერთმა თანამშრომელმა მიაწოდა მათ ინფორმაცია, სააგენტოს მიერ სავარაუდოდ ყალბი პირადობის მოწმობების დამზადების შესახებ. მათი განცხადებით, ამ პირის ინფორმაციით, ყალბი პირადობის მოწმობები საპრეზიდენტო არჩევნების მეორე ტურში, სალომე ზურაბიშვილის სასარგებლოდ გასაყალბებლად იბეჭდება და ამ პროცესს სააგენტოს მაღალი თანამდებობის პირები ხელმძღვანელობენ.

სახელმწიფო სერვისების განვითარების სააგენტოს თავმჯდომარემ, სოსო გიორგაძემ გავრცელებულ ინფორმაციას ჭორი უწოდა.