გენერალური პროკურატურა „კაბელების საქმესთან” დაკავშირებით განცხადებას ავრცელებს

გენერალურმა პროკურატურამ „კაბელების საქმესთან“ დაკავშირებით განცხადება გაავრცელა, რომელშიც გამოძიებისა და სასამართლო პროცესების მიმდინარეობის შესახებ განმარტებას აკეთებს.

პროკურატურის განცხადებით, კაბელების საქმეზე სასამართლოს მიერ გამოტანილი გამამტყუნებელი განაჩენის შემდეგ, საზოგადოების სრულად ინფორმირების მიზნით, პროკურატურამ მიზანშეწონილად მიიჩნია გაესაჯაროებინა საქმის მტკიცებულებების ნაწილი.

აქედან გამომდინარე, უწყებამ 2016 წლის 19 მაისს www.pog.gov.ge-ზე საქმის არასაიდუმლო დოკუმენტების დიდი ნაწილი გამოაქვეყნა, რომელიც პროკურატურის თქმით, დაინტერესებულ პირს საქმესთან დაკავშირებით სრული ინფორმაციის მიღების შესაძლებლობას აძლევდა. 

„2016 წლის 16 მაისს თბილისის საქალაქო სასამართლომ სრულად გაიზიარა ბრალდების მიერ წარდგენილი მტკიცებულებები და ბრალდებული თავდაცვის სამინისტროს ხუთი მაღალჩინოსანი დამნაშავედ ცნო საქართველოს სისხლის სამართლის კოდექსის 182-ე მუხლის მეორე ნაწილის ,,ა“, ,,დ“ და მესამე ნაწილის ,,ბ“ პუნქტებით და მათ თავისუფლების აღკვეთა შვიდი წლით და ორი წლით თანამდებობის დაკავების უფლების ჩამორთმევა მიესაჯათ.

2017 წლის 26 იანვარს თბილისის სააპელაციო სასამართლომ შეცვალა თბილისის საქალაქო სასამართლოს გადაწვეტილება და ხუთივე ბრალდებული დამნაშავედ ცნო საქართველოს სისხლის სამართლის კოდექსის 332-ე მუხლის პირველი ნაწილით. თითოეულ მათგანს მიესაჯა თავისუფლების აღკვეთა ერთი წლისა და ექვსი თვის ვადით. უზენაესმა სასამართლომ არ განიხილა არც ერთი მხარის საჩივარი და ამიტომ, საქმეზე ძალაში დარჩა სააპელაციო სასამართლოს გადაწყვეტილება", – წერია გენერალური პროკურატურის განცხადებაში.

„კაბელების საქმეს“ პროკურატურამ გრიფის საიდუმლო 2014 წლის 25 ნოემბერს მოხსნა, რის შემდეგაც საქმის პროკურატურის თქმით, 90%-ზე მეტი იყო არასაიდუმლო.

5 თებერვალს „კაბელების საქმესთან“ დაკავშირებით კომენტარი ტელეკომპანია „პირველის“ ეთერში პარლამენტის თავმჯდომარე ირაკლი კობახიძემ მოსამართლეთა კორპუსის თემის კონტექსტში გააკეთა. კობახიძის თქმით, როდესაც ის პარტიის აღმასრულებელი მდივანი იყო საქმეში ჩაიხედა „და იქ იყო დანაშაულის არათუ ნიშნები, მკაფიოდ გამოხატული დანაშაული იყო, საუბარი იყო მილიონების მითვისებაზე... შეგვიძლია, გავარჩიოთ დეტალურად. 2015 წელი იყო, იმ ადამიანებს კაპიკი არ წაუღიათ, მე რამდენადაც ვიცი“, - თქვა კობახიძემ და დასძინა, რომ ის თუ ვინ წაიღო ფული, სასამართლომ უნდა დაადგინოს. „დანაშაული იყო ჩადენილი, თუმცა, ბოლომდე, როგორც ჩანს, ვერ გაიხსნა საქმე, რაღაც დონეზე გაჩერდა“, - თქვა კობახიძემ.

კობახიძის პასუხად ტელეკომპანია „პირველს“ დაუკავშირდა „კაბლების საქმეში“ ბრალდებულების ერთ-ერთი ადვოკატი და „თავისუფალი დემოკრატების“ ყოფილი წევრი ლევან სამუშია და განაცხადა, რომ ამ საქმეს გრიფი ედო და არავის ჰქონდა მასში ჩახედვის უფლება, მათ შორის არც ირაკლი კობახიძეს. სამუშია დაინტერესდა, თუ საიდან იცოდა პარლამენტის თვმჯდომარემ ამ საქმის მასალების შესახებ და რატომ მიუწვდებოდა მათზე ხელი.