რას ამბობს სმითების მკვლელობაში ბრალდებული მწყემსი აღიარებით ჩვენებაში. ვიდეო

სმითების ოჯახის მკვლელობაში ბრალდებული მალხაზ კობაური გამოძიების პროცესში რამდენჯერმე გამოიკითხა. კადრები, რომელიც "იმედის კვირამ" მოიპოვა 2018 წლის 8 ივლისს, პოლიციის განყოფილებაში ზუსტად იმ დროს არის გადაღებული, როცა მალხაზ კობაურმა სამართალდამცველებს აღიარებითი ჩვენება მისცა და ორი ადამიანის, მამა - შვილის მკვლელობა აღიარა. მამას ორჯერ ესროლა, რისი თვითმხილველიც ბიჭი იყო, რომელმაც ტირილი დაიწყო, რაზეც კობაური გაღიზიანდა და თავზე მიბჯენით მოკლა მცირეწლოვანი ბიჭი. კობაური ჩვენებაში იხსენებს, რის გამო დაიწყო კონფლიქტი, მაგრამ არაფერს ამბობს ლორა სმითის გაუპატიურების და შემდეგ მკვლელობის შესახებ. პირიქით, მან თავდაპირველად სულ სხვა ვერსია უამბო გამომძიებლებს. 

კერძოდ, კობაური იტყუება, როცა ამბობს, რომ სროლის შემდეგ ლორა სმითი გაიქცა. მეუღლის და  შვილის მკვლელობა ლორა სმითს არ უნახავს, ის ქმარ-შვილს ჩანჩქერზე არ გაჰყოლია. შესაბამისად ის ვერ დაინახავდა სროლის მომენტს. კობაური ცრუობს, როცა აცხადებს, რომ ქალი გაიქცა და რეაქცია არ ჰქონია შვილის მკვლელობაზე. ლორა სმითი მკვლელობის მომენტში შემთხვევის ადგილიდან დაახლოებით ნახევარი კილომეტრის მოშორებით იყო, იმ ადგილას, სადაც კარავი იყო გაშლილი და სადაც ღამის გათენებას აპირებდა ოჯახი.

"იმედის კვირამ" ასევე მოიპოვა საქმის მასალებში დაცული ფოტოები, რომელსაც რამდენიმე დღეში სასამართლოზე წარადგენენ. კადრები საგამოძიებო ექსპერიმენტის დროსაა გადაღებული. ფოტოებზე ჩანს, რომ კობაური სამართალდამცველებს ათვალიერებინებს იმ ადგილს, სადაც მამა შვილთან ერთად გადაადგილდებოდა, კადრში ჩანს ჩანჩქერიც, რომლის ნახვაც უნდოდათ სმითებს. საგამოძიებო ექსპერიმენტისას გადაღებულ ფოტოებში მოხვდა ის თოვლის ზვავიც, სადაც 5 დღის განმავლობაში იყო გადამალული მოკლული ბავშვის ცხედარი. 

მცირეწლოვანი ბიჭის სხეული კობაურმა მკვლელობის ადგილიდან 15 მეტრში თოვლში დამარხა. გვამთან ერთად იპოვეს სმითების კუთვნილი ფოტოაპარატი, რომლით გადაღებულ ერთ-ერთ ფოტოზეც მალხაზ კობაური სანადირო თოფით ჩანს. აქ საინტერესოა ერთი რამ, ამ ფოტოებით დასტურდება, რომ კობაური მარტო მოქმედებდა, მას არ ჰყავდა თანამზრახველი. გამოძიებით მოპოვებული ყველა მტკიცებულებით დასტურდება რომ იმ ტერიტორიაზე სადაც მკვლელობა მოხდა სხვა, უცხო პირი არ ყოფილა. 

რაც შეეხება დაზიანებებს, რომელიც ექსპერტიზით დადგინდა. საქმის მასალებით ჩანს, რომ ქალს დაზიანებები მკვლელობამდე მიაყენა ბრალდებულმა. რაც შეეხება მის მეუღლეს, სამედიცინო ექსპერტიზამ დაადგინა რომ რაიან სმითმა სიკვდილის შემდეგ მიიღო მრავლობითი მოტეხილობები, მათ შორის ხერხემლის მალების. ამ ფაქტს დაცვის და ბრალდების მხარე განსხვავებულად ხსნის.  

ადვოკატი ირწმუნება, რომ კაცის გვამი გადაადგილებულია და სწორედ მაშინ დააზიანა ვიღაცამ, ბრალდების მხარე კი ამბობს რომ მდინარეში დაზიანდა სხეული.  

კობაურის ადვოკატი ეჭვქვეშ აყენებს სამედიცინო ექსპერტიზის პასუხებსაც და ამტკიცებს, რომ დასკვნა გაყალბებულია. 

სასამართლოზე კობაურის წინააღმდეგ წარადგენენ  მის მობილურ  ტელეფონში აღმოჩენილ კადრებსაც. ფოტოებზე მოკლული ლორა სმითი ჩანს, ფოტოს ავტორი კი ბრალდებულია. 

საინტერესოა ისიც, რომ კობაურის ბრალეულობის შესახებ თავდაპირველად მწყემსებმა იეჭვეს. ჩვენებების მიხედვით, როცა კობაურმა გაიგო, რომ ხეობაში პოლიციელები გამოჩნდენ, მან მწყემსების თანდასწრებით აიღო თოფი, გაახვია ის ნაჭერში და გადამალა. ამან მწყემსები დააეჭვა და მათ სამართალდამცველებს შეატყობინეს. 

"იმედის კვირის" ინფორმაციით, სმითების მკვლელობის საქმის არსებითი განხილვა 5 მარტს დაიწყება. მალხაზ კობაური ახლა გლდანის მე - 8 დაწესებულებაშია და პირველ სასამართლო სხდომას ელოდება. ამ გახმაურებული საქმის სხდომას დაესწრებიან სმითების ოჯახის წევრებიც და საელჩოს წარმომადგნელებიც.

სმითების მკვლელობაში ბრალდებულს ვერდიქტი მოსამართლე გოგა კუპრეიშვილმა და 12 მსაჯულმა უნდა გამოუტანონ. ამ საქმეზე განაჩენი მარტის ბოლომდე გამოცხადდება, რადგან 9-თვიანი ვადა სწორედ 9 აპრილს იწურება.