სასამართლომ კირკიტაძე ისევ პატიმრობაში დატოვა

„ნაციონალური მოძრაობის“ ერთ-ერთი ლიდერი დავით კირკიტაძე მოსამართლემ ისევ პატიმრობაში დატოვა. ნუნუ ნემსიწვერიძემ დაცვის მხარის შუამდგომლობა კირკიტაძის თავდებით გათავისუფლების შესახებ არ დააკმაყოფილა. პროცესი გურჯაანის რაიონულ სასაამრთლოში ცოტა ხნის წინ დასრულდა.

დაცვის მხარემ სხდომაზე მოსამართლეს ის დეპუტატები წარუდგინა, რომლებმაც მზაობა გამოთქვეს კირკიტაძეს გათავისუფლების შემთხვევაში თავდებში ჩადგომოდნენ, რომ ის ქვეყნიდან არ მიიმალება და სასამართლო პროცესებზე გამოცხადდება, თუმცა მოსამართლემ ამ საკითხის განხლვაზე უარი თქვა.

მოსამართლის განცხადებით, მისი ნათქვამი დაცვის მხარემ წინა სხდომაზე არასწორად გაიგო და მას თავმდებების მოყვანა არ უთხოვია.

გურჯაანის რაიონულ სასამართლოსთან ამ წუთებში საპროტესტო აქცია მიმდინარეობს. "ნაციონალური მოძრაობის" ლიდერები და მათი თანამოზარეები მოსამართლის გადაწყვეტილებს აპროტესტებენ და ამბობენ, რომ ხელისუფლება კანონის ჩარჩოებიდან გავიდა, როცა დავით კირკიტაძის თავდებით გათავისუფლებაზე ნუნუ ნემსიწვერიძემ საკითხი განუხილველად დატოვა.

მოსამართლემ დავით კირკიტაძე პატიმრობაში 25 თებერვალსაც დატოვა.

დავით კირკიტაძეს ბრალი ოფიციალურად გასული წლის 19 დეკემბერს წარუდგინეს. 20 დეკემბერს გამართულ სხდომაზე კი კირკიტაძე მოსამართლე დავით ნარიმანიშვილმა პატიმრობაში დატოვა. ნაციონალური მოძრაობის წევრს გამოძიება 353-ე პრიმა მუხლით გათვალისწინებულ დანაშაულს ედავება, რაც პოლიციელის მიმართ ძალადობას და წინააღმდეგობის გაწევას გულისხმობს.

კირკიტაძე შსს-მ პოლიციელზე თავდასხმის, ფიზიკური შეურაცხყოფისა და ქონების დაზიანების გამო 17 დეკემბერს გურჯაანში დააკავა. ამ დროს ის თანაგუნდელთან, ნიკა მელიასთან ერთად იმყოფებოდა.