რა ვითარებაა თბილისის ზოგიერთ რესტორანში რომლებიც სეს-მა შეამოწმა. ვიდეო

გაყინული ღომი, სამი კვირის წინ მომზადებული ხაში, საწებელი ღია ჭურჭელში იატაკზე, იქ სადაც მღრღნელები დადიან და გაურკვეველი წარმომავლობის ხორცი - ასეთი სურათი დახვდა "იმედის კვირას" და სურსათის ეროვნული სააგენტოს თანამშრომლებს თბილისსა და რეგიონებში არსებულ რესტორნების ნაწილში. თბილისში სესმა 52 რესტორანი და კაფე შეამოწმა. 

შემოწმებული დაწესებულებებიდან ნაწილი დროებით დახურეს, ნაწილს ჯარიმა გამოუწერეს, ნაწილმა კი თავად აღიარა ანტისანიტარია და არაკეთილსინდისიერი დამოკიდებულება რესტორნის სტუმრების მიმართ. 

მაგალითად თბილისში მდებარე "პაბ რესტორანში" მაცივარში 15 დღის წინ დამზადებული და შემდეგ გაყინული ხაში აღმოჩნდა, რომელსაც შეკვეთის შემთხვევაში ადნობენ და მომხმარებელს აწვდიან. ამ რესტორანში გაყინული იყო წვნიანებიც. რესტორანი დაჯარიმდა და საწარმოო უფლება დროებით შეუჩერდა. 

გაურკვეველი წარმომავლობის ცხვრის ხორცი იპოვეს თბილისში, რესტორან „გაბალას კალათაში“. „გაბალას კალათა“ დაიხურა. დაჯარიმდა 1000 ლარით. 

კრიტიკული შეუსაბამობა და კოროზირებული ღუმელი - ამ დარღვევების გამო საწარმოო უფლება დროებით შეუჩერდათ რესტორნებს „მერსის“ და "ასტორიას“. 

გადამღებ ჯგუფს ფიზიკური შეურაცხყოფა მიაყენა რესტორან „კავკაზის“ ერთ-ერთმა თანამშრომელმა. ხელმძღვანელობამ სამზარეულოში შესვლის უფლება არ მისცა, სურსათის ეროვნული სააგენტოს თანამშრომლებმა „კავკაზიში“ არაერთი დარღვევა აღმოაჩინეს, დააჯარიმეს და  დროებით საწარმოო პროცესი შეუჩერეს. 

თბილისში   შემოწმებული 52 ობიექტიდან კრიტიკული შეუსაბამობის გამო 12 დაწესებულება 1000 ლარით დაჯარიმდა. მათ პრობლემების აღმოსაფხვრელად გონივრული ვადაც მიეცათ. 

თბილისის გარდა შეამოწმეს ზესტაფონის გზაზე მდებარე რესტორნებიც. სურსათის ეროვნული სააგენტოს თანამშრომლებმა რესტორან „მალხაზიში“ ძველი, ვადაგასული ხორცი  აღმოაჩინეს, რომელიც ადგილზე დაილუქა. რესტორანი ,,მალხაზი“კრიტიკული  შეუსაბამობის გამო 1000 ლარით დაჯარიმდა და სასაწყობე მაცივრის გამოყენების უფლება აეკრძალა. 

ანტისანიტარია იყო რესტორან „ხევშიც“. სასაუზმის სამრეცხაოში, კი ღია საკანალიზაციო სისტემა. რესტორანს საწარმოო პროცესი  დროებით შეუჩერდა და შესაბამისად დაჯარიმდა კიდეც.

რესტორანი "ჯარგვალშიც" ანტისანიტარია და დარღვეული ჰიგიენურ-სანიტარული ნორმები, ასევე ვადაგასული, შესაწვავად გამზადებული ხორცი აღმოჩნდა.  „ჯარგვალიც“ არ აღმოჩნდა გამონაკლისი. სურსათის ეროვნული სააგენტოს თანამშრომლებმა დაწესებულება 1000 ლარით დააჯარიმეს.

სურსათის ეროვნული სააგენტო საქართველოში არსებული ყველა რესტორნის წარმომადგენელს რჩევების გათვალისწინებისკენ მოუწოდებს.