პარლამენტში ფინანსთა მინისტრის საკომიტეტო მოსმენა ხმაურის ფონზე წარიმართა. მთავარი

პარლამენტის საფინანსო-საბიუჯეტო კომიტეტის სხდომაზე ფინანსთა მინისტრის, ივანე მაჭავარიანის მოსმენა დასრულდა. მოსმენა ცხარე კამათის ფონზე მიმდინარეობდა. ვანო მაჭავარიანი პარლამენტში "ევროპული საქართველოს“ მიწვევით იყო მისული.

სიტყვიერი დაპირისპირება მინისტრსა და გიგა ბოკერიას შორის მოხდა, აზრთა სხვადასხვაობა კი დაგროვებითი პენსიის რეფორმამ გამოიწვია. ასევე ხმაურით განიხილეს სესხებთან დაკავშირებით სახელმწიფოს მიერ გატარებული რეფორმები. დეპუტატმა ირაკლი აბესაძემ საკომიტეტო მოსმენის დროს ბიუროკრატიული ხარჯების შესახებ გაამახვილა ყურადღება. დარბაზში ხმაური იყო მაშინაც, როდესაც კითხვა დასვა რომან გოცირიძემ, რომელიც ვალების განულების პროგრამას შეეხებოდა. 

„საბანკო რეგულაციების მთავარი მიზანია, ქვეყანაში გრძელვადიანი ეკონომიკური ზრდის ხელშეწყობა“, - განაცხადა ფინანსთა მინისტრმა საბანკო რეგულაციების აუცილებლობაზე საუბრისას.

მან კიდევ ერთხელ აღნიშნა, რომ წლების განმავლობაში, დაკრედიტების პროცესში ჩამოყალიბდა რამდენიმე არასწორი პრაქტიკა და გამოწვევა.  ფინანსთა მინისტრმა ერთ-ერთ მთავარ პრობლემად დოლარიზაციის მაღალი დონე დაასახელა, ასევე, ისაუბრა სესხების გაცემის უპასუხისმგებლო პოლიტიკაზე, რაზეც ქვეყანას საერთაშორისო ორგანიზაციები მიუთითებდნენ.

„შრომისუნარიანი მოსახლეობის ერთ მესამედზე მეტი იყო შავ სიაში. ე.წ. ონლაინ სესხები გაიცემოდა, ძირითადად, სამომხმარებლო დანიშნულებით და საპროცენტო განაკვეთები ხშირად ათას პროცენტს აღწევდა. ეს არ არის მარტო სოციალური საკითხი. ეს არის მნიშვნელოვანი ეკონომიკური პრობლემა. როგორ წარმოგიდგენიათ გრძელვადიანი ეკონომიკის ზრდა, როდესაც სამუშაო ძალის უდიდესი ნაწილი განწირულია არაფორმალურ სექტორში მუშაობისთვის?!“, - აღნიშნა ფინანსთა მინისტრმა.

საპენსიო რეფორმასთან დაკავშირებით, ივანე მაჭავარიანმა განაცხადა, რომ რეფორმა საქართველოსთვის ისტორიული მნიშვნელობისაა. 

მან ყურადღება გაამახვილა იმ პოზიტიურ შეფასებებზე, რომლებიც ასახულია სარეიტინგო სააგენტოების მიერ გაკეთებულ დასკვნებში. მაგალითისთვის მან მოიყვანა სარეიტინგო სააგენტო Fitch-ის დასკვნა, სადაც აღნიშნულია, რომ  საპენსიო სისტემა არის რეფორმა, რომელიც საშუალოვადიან პერიოდში, იქნება საგარეო რისკების შემცირების ერთ-ერთი მნიშვნელოვანი ფაქტორი.

„ჩვენ ძალიან კარგად გვესმის ქვეყანაში არსებული საპენსიო სისტემის პრობლემები. ამგვარ გამოწვევებზე საპასუხოდ ყველაზე საუკეთესო, რაც მსოფლიოში გამოიგონეს, არის მრავალსვეტიანი საპენსიო სისტემა. სწორედ ეს არის ის, საითკენაც უნდა წავიდეთ ჩვენც. ბუნებრივია, ეს სისტემა გულისხმობს არსებული საბაზისო, უნივერსალური სვეტის შენარჩუნებასა და მნიშვნელოვნად გაძლიერებას. მრავალსვეტიანი სისტემის მთავარი მიზანი იყო და არის, ფისკალურად მდგრადი სისტემის შექმნა, რომელიც უზრუნველყოფს ჩვენი მოქალაქეების ღირსეულ საპენსიო შემოსავლებს“, - აღნიშნა ივანე მაჭავარიანმა. 

მინისტრმა საკომიტეტო მოსმენის დროს ყურადღება გაამახვილა ქვეყნის ეკონომიკურ ზრდასა და საერთაშორისო ეკონომიკურ რეიტინგებზე. მინისტრის განცხადებით, საერთაშორისო სავალუტო ფონდის შეფასებით, საქართველო კვლავ ინარჩუნებს ლიდერის პოზიციას რეგიონში.

როგორც მან განაცხადა, სსფ-მ არაერთხელ აღიარა, რომ მაღალი მოსალოდნელი ზრდა, სწორედ მთავრობის მიერ გატარებული ეკონომიკური რეფორმების შედეგად არის მოსალოდნელი.

„ეკონომიკური რეფორმები ჩვენი მთავრობის მთავარი პრიორიტეტია და გვჯერა, რომ მნიშვნელოვანი შედეგების მიღწევა ეკონომიკურ ზრდაში, მით უმეტეს, როდესაც საუბარია ხარისხობრივ ზრდაზე, მხოლოდ რეფორმების გზითაა შესაძლებელი“, - აღნიშნა ფინანსთა მინისტრმა.

მინისტრმა უპასუხა "ომეგა ჯგუფის" წარმომადგენელსაც და თქვა, რომ ქართული სახელმწიფო, საქართველოს საგადასახადო ორგანოები, ფინანსთა სამინისტრო არავისთან ისე მართალი არ არის, როგორც "ომეგასთან".