გიორგი ცუცქირიძე: ოქროს სია აქამდეც უნდა გაუქმებულიყო

"მიმაჩნია, რომ ე.წ. „ოქროს სიის“ გაუქმებასთან დაკავშირებით ცოტა ზედმეტი აჟიოტაჟია ატეხილი, მათ შორის სოციალურ ქსელებში", - ამის შესახებ ექსპერტი გიორგი ცუცქირიძე Facebook-ზე წერს.

მისი თქმით, მიუხედავად იმისა, რომ იმპორტის გადასახდელების გადახდის ვადა მცირდება 30 დღის ნაცვლად 5 დღემდე არა მგონია კომპანიები Cash Flow-ში „გაიჭედონ“ და ეს უარყოფითად აისახოს ბიზნეს-ოპერაციებზე, რაზეც კეთდება აქცენტები ბიზნესმენების თუ ცალკეული ექსპერტების მხრიდან.

ექსპერტის მოსაზრებით, გასაგებია, რომ ბიზნესს სჭირდება თანხები საბრუნავი კაპიტალის დასაფინანსებლად.

"პირველ ეტაპზე გარკვეული პრობლემები, განსაკუთრებით მსხვილ ბიზნეს შეიძლება შეექმნას, საბრუნავი თანხის შემცირებით, მაგრამ ამ მოდელზეა აწყობილი დღეს მთელი ევროპა; აქვე ავღნიშნავ, რომ ევროკავშირის რეგულაციები ისედაც გვავალდებულებს ამ სახის ახალი რეგულაციის და ეკონომიკური ოპერატორის ცნების შემოღებას, რომელიც წმინდა კონკურენტუნარიანობის პრინციპზე იქნება აგებული", - წერს სპეციალისტი და აქვე ამბობს, რომ კომპანიებს ბიზნეს-მოდელების გადაწყობა მოუწევთ:

"ვფიქრობ, მათ ამისათვის აქვთ საკმარისი დრო მიცემული. კერძოდ, ზემოაღნიშნული ცვლილება აქციზური საქონლის მიმართ ამოქმედდება გამოქვეყნებიდან მე-10 დღეს, ხოლო სხვა შემთხვევაში გამოქვეყნებიდან სულაც 30-ე დღეს; ასევე არა მგონია დღეს ამ ოქროს სიას რაიმე დიდი შეღავათი ჰქონდეს, მიუხედავად იმისა, რომ არსებული პრაქტიკით კომპანიებს შეეძლოთ პროდუქციის შემოტანიდან 30 დღის ვადაში გადაეხადათ აქციზის სრული ღირებულება, რადგან საბაჟო და საგადასახადო რეფორმის, მათ შორის ციფროვიზაციის ელემენტების ფართოდ დანერგვის შედეგად, მნიშვნელოვნად არის გამარტივებული საბაჟოზე გაფორმების პროცედურა", - წერს გიორგი ცუცქრიძე.

ექსპერტის თქმით, "ოქროს სიაში" შემავალ 217 კომპანიას ისედაც ეძლევა უფლება, რომ საბაჟო გაფორმება ჩაატარონ თავიანთ საწყობებში და მათ მიერ წინასწარ მითითებულ ადგილებზე. 

"მიმაჩნია, რომ აღნიშნული გადაწყვეტილება ცოტა დაგვიანებულიც კი არის და კარგი იქნებოდა ცოტა ადრეც გაუქმებულიყო. რაც შეეხება აქამდე არსებულ მოდელს და 5-დღიან შეღავათებს, ფაქტია, რომ არსებული 5-დღიანი შეღავათებით ისარგებლა ათეულობით არაკეთილსინდისიერმა გადამხდელმა, რომლებიც აფუძნებდნენ რა ახალ ე.წ. ერთჯერად კომპანიებს", დღგ-ს აღარ იხდიდნენ. მიმაჩნია, რომ ამ ახალ მოდელს, რომელიც ეფუძნება რა ევროკავშირის პრაქტიკას, აქვს მთავარი - ყველა სახის გადამხდელი უნდა იყოს ჩაყენებული თანაბარ და კონკურენტუნარიან პირობებში, და ეს განსაკუთრებით მნიშვნელოვანი მცირე და საშუალო ბიზნესისთვის იქნება. ნიშანდობლივია, რომ ეს პრინციპი ისედაც არის ასახული ჩვენს კონსტიტუციაში", - წერს გიორგი ცუცქირიძე.

უკმაყოფილებას გამოთქვამს ასევე გადასახადის გადამხდელთა კავშირიც.