მინისტრი: მნიშვნელოვანია როგორ იგრძნობს თითოეული ოჯახი ეკონომიკის ზრდას

პარლამენტის დარგობრივი ეკონომიკის კომიტეტი ეკონომიკისა და მდგრადი განვითარების მინისტრ ნათია თურნავას უსმენს.

"საქართველოს ეკონომიკური ზრდის მაჩვენებელი ჩვენს რეგიონში ერთ-ერთი ყველაზე დინამიკურია და უახლოეს ათწლიან პერსპექტივაში, სხვადასხვა შეფასებით, ის გადააჭარბებს წლიურ ხუთ პროცენტს, რაც საკმაოდ მაღალი მაჩვენებელია. არაერთხელ თქმულა, რომ ეს არ არის საკმარისი და ჩვენ სამთავრობო გუნდი, ვგეგმავთ გავატაროთ ყველა ღონისძიება იმისთვის, რომ უფრო მეტად ჩავრთოთ ყველა აუთვისებელი რესურსი ეკონომიკურ ზრდაში და მეტად გამოვიყენოთ ეკონომიკური ზრდის შემდგომი დაჩქარების რესურსი, თუმცა დამეთანხმებით, რომ ჩვენი მოსახლეობისთვის კონკრეტული ზრდის ციფრების დასახელებაზე მეტად მნიშვნელოვანია, როგორ იგრძნობს თითოეული ოჯახი ამ ზრდას, როგორ მივიტანთ მას თითოეულ ადამიანამდე.

ეკონომიკის სამინისტროს ხედვა და დაწყებული სახელმწიფო პროგრამები, რომელიც მნიშვნელოვან წვლილს შეიტანს სიღარიბის დაძლევაში, არის ის პროგრამები და ინფრასტრუქტურა, რომლის განხორციელება დინამიკური, სტაბილური ეკონომიკური ზრდის ფარგლებში გახდა შესაძლებელი. ჩვენ გვაქვს ფუფუნება, რომ ამ ხუთპროცენტიანი ზრდის ფარგლებში თანხები ჩავდოთ და სახელმწიფომ განახორციელოს ინვესტიცია, არა მხოლოდ მაგისტრალურ ინფრასტრუქტურაში, რაც ჩვენ ძალიან კარგად გვაქვს განვითარებული, არამედ იმ ინფრასტრუქტურაში, რომელიც მაქსიმალურად მოიცავს მთელ საქართველოს“, - განაცხადა ნათია თურნავამ.

ეკონომიკის მინისტრის გამოსვლით უკმაყოფილოები არიან "ნაციონალური მოძრაობისა" და "ევროპული საქართველოს" წევრები.

"კითხვები ნათია თურნავასთან ისეთ სტრატეგიული მნიშვნელობის პროექტს უკავშირდება, როგორიცაა ანაკლია. მთავრობის ურთიერთსაწინააღმდეგო განცხადებები და ქმედებები კონსორციუმს კერძო ფონდებიდან და საერთაშორისო საფინანსო ინსტიტუტებიდან თანხების მოზიდვას ურთულებს. ნათია თურნავამ უნდა ახსნას, ბოლო-ბოლო რა უნდა საქართველოს მთავრობას.

ასევე, ჭიათურაში ჩვენ ვხედავთ საქართველოს მთავრობის პირდაპირ კორუფციულ ინტერესს, რომელიც რომ არ ყოფილიყო, კომპანია გაცილებით მეტად მოახერხებდა მუშებისათვის ხელფასების გაზრდას და სულ სხვა მდგომარეობა გვექნებოდა.

საქართველოს მთავრობამ საკუთარი კერძო ინტერესებიდან გამომდინარე, ქვეყნისთვის მოგებიანი ხელშეკრულება წაგებიან ხელშეკრულებაში გაცვალა - თურნავამ უნდა ახსნას, რა მდგომარეობაა “გაზპრომთან“ გაფორმებულ ხელშეკრულებასთან დაკავშირებით“, - თქვა ზურაბ ჭიაბერაშვილმა.