10 ბიზნეს-გაერთიანება ფინანსთა მინისტრს რამდენიმე შეკითხვით მიმართავს

10 ბიზნეს-გაერთიანება საქართველოს ფინანსთა მინისტრს, ივანე მაჭავარიანს მიმართავს. საქმე ეხება ე.წ. ოქროს სიაში მყოფი კომპანიებისთვის იმპორტის გადასახდელების გადახდის ვადასთან დაკავშირებული შეღავათის გაუქმებას. 

ბიზნესგაერთიანებები ფინანსთა მინისტრისგან რამდენიმე საკითხის განმარტებას ითხოვენ.

"მოგმართავთ თხოვნით, განგვიმარტოთ: ამ გადაწყვეტილებების მიღების მიზეზები და არგუმენტაცია; რა ფისკალურ ეფექტს ელოდებით მათი ძალაში შესვლის შემდეგ; რითი იყო გამოწვეული ბიზნესთან წინასწარი კონსულტაციების გარეშე აღნიშნული გადაწყვეტილებების მყისიერად მიღება", -წერია მიმართვაში რომელსაც ხელს აწერენ:
1.    გადასახადის გადამხდელთა კავშირი 
2.    დისტრიბუტორთა ბიზნეს ასოციაცია
3.    ინფრასტრუქტურის მშენებელთა ასოციაცია
4.    ქართულ მაღაზიათა ასოციაცია
5.    საერთაშორისო სავაჭრო პალატა
6.    გერმანიის ეკონომიკური გაერთიანება
7.    საქართველოს მცირე და საშუალო საწარმოთა ასოციაცია
8.    ნავთობპროდუქტების იმპორტიორთა კავშირი
9.    საქართველოს მწარმოებელთა ფედერაცია
10.    საქართველო-შვეიცარიის ბიზნეს ასოციაცია

ფინანსთა სამინისტროს ინფორმაციით კი, „ოქროს სიის“ კომპანიები კვლავ ისარგებლებენ გამარტივებული საბაჟო სერვისითა და პროცედურებით, ასევე „ოქროს სიის“ მონაწილე კომპანიებისთვის დაწესებული სხვა შეღავათებით.

დღეიდან ამოქმედდა ფინანსთა მინისტრის ბრძანება აქციზური საქონლის მიმართ იმპორტის ღირებულების გადახდის ნაწილში, ხოლო 2 ივლისს „ოქროს სიის“ მონაწილე ყველა კომპანიისთვის ამოქმედდება იმპორტის გადასახდელების გადახდის ხუთდღიანი ვადა და ყველა კომპანია ჩადგება თანაბარ პირობებში. კერძოდ, იმპორტის გადასახდელების გადახდის ხუთდღიანი ვადა ასევე გავრცელდება „ოქროს სიის“ მონაწილის კუთვნილ საქონელზე (ნაცვლად ცვლილებამდე მოქმედი 30-დღიანი ვადისა), წინასწარ (საქონლის შემოტანამდე) დეკლარირებულ საქონელზე (ნაცვლად ცვლილებამდე მოქმედი 15-დღიანი ვადისა) და დეკლარანტის მიერ შევსებული და რეგისტრირებული დეკლარაციით გაფორმებისას (ნაცვლად ცვლილებამდე მოქმედი 10-დღიანი ვადისა).

ეს ცვლილება აქციზური საქონლის მიმართ ამოქმედდება ბრძანების გამოქვეყნებიდან მე-10 დღეს (2019 წლის 12 ივნისს), ხოლო სხვა შემთხვევაში – ბრძანების გამოქვეყნებიდან 30-ე დღეს (2019 წლის 2 ივლისს). „ოქროს სიის“ მონაწილის კუთვნილ, სეს ესნ-ის 1001 სასაქონლო პოზიციით გათვალისწინებულ ხორბალზე კვლავ იმოქმედებს იმპორტის გადასახდელების გადახდის 45-დღიანი ვადა.

ამასთან, „ოქროს სიის“ კომპანიები კვლავ ისარგებლებენ გამარტივებული საბაჟო სერვისითა და პროცედურებით, ასევე „ოქროს სიის“ მონაწილე კომპანიებისთვის დაწესებული სხვა შეღავათებით. ცვლილების ძალაში შესვლამდე რეგისტრირებული საბაჟო დეკლარაციით იმპორტის სასაქონლო ოპერაციაში გაცხადებულ საქონელზე იმპორტის გადასახდელები გადაიხდება დეკლარაციის რეგისტრაციის დღისათვის მოქმედი წესით განსაზღვრულ ვადაში.