თბილისის მერია ჟვანიას ქუჩის არეალში სამშენებლო ნებართვებს აღარ გასცემს

თბილისის მერის კახა კალაძის განცხადებით, ის განაშენიანების რეგულირების გეგმები და სამშენებლო ობიექტები, რომლებიც გამზადებული იყო და ელოდებოდნენ მშენებლობის ნებართვის მიღებას ჟვანიას ქუჩის არეალში, ნებართვას ვერ მიიღებენ. ამის შესახებ კალაძემ დედაქალაქის მთავრობის სხდომაზე განაცხადა. 

"ეს ვერ მოხდება და არ მოხდება უსაფრთხოების ნორმებიდან გამომდინარე. არავისთვის საწყენია არ უნდა იყოს რატომ არ ხდება ნებართვების გაცემა, როდესაც ჩვენ ვსაუბრობთ ადამიანების უსაფრთხოებაზე და საქმე ეხება ადამიანების სიცოცხლეს, აქ უკომპრომისო არ ვიქნებით და ვერ დავუშვებთ ისეთ ადგილებში მშენებლობის ნებართვის გაცემას, რომელიც შეიძლება პრობლემა იყოს სამომავლოდ",- განაცხადა კახა კალაძემ.

დამატებითი ინფორმაცია მოსახლეობას მერის მოადგილემ, მაია ბითაძემ მიაწოდა:

"ჟვანიას ქუჩისა და მიმდებარე ტერიტორიის, ასევე მარჯვენა და მარცხენა ფერდობის კვლევა დავალების შესაბამისად ჩატარდა. კვლევა ჩატარდა 200 ჰექტარზე და დეტალური ინფორმაცია მოგვცა ფერდების გეოლოგიური და ჰიდროლოგიური მდგრადობის შესახებ. სამწუხაროდ ის მოლოდინები, რომელიც ჩვენ გვქონდა ამ თემებთან დაკავშირებით დადასტურდა, განსაკუთრებით საუბარია მარჯვენა ფერდის მძიმე გეოლოგიური ჰიდროლოგიური მდგომარეობასთან მიმართებით. იქედან გამომდინარე, რომ ჩვენ ახალი მენეჯმენტის ფარგლებში არც ერთი სამშენებლო ნებართვა არ გაგვიცია ამ ტერიტორიაზე და დამტკიცებული განაშენიანების გეგმები შეუსაბამოდ იქნა გამოცხადებული, ამ კვლევამ დაადასტურა, რომ ჩვენ რეალურად სწორად მოვიქეცით, როდესაც გამზადებული ნებართვები არ გავეცით.

პრობლემა შეიძლება შეექმნას ყველა იმ პროექტს რომლის მშენებლობაც მარჯვენა ფერდზე იყო გადაწყვეტილი, ამ კვლევის თანახმად დამატებითი პრევენციული ღონისძიებები უნდა განხორციელდეს ქვათაცვენის და გეოლოგიური მდგრადობიდან გამომდინარე.  ჩვენ კომუნიკაცია გვქონდა მარცხენა ფერდზე "ბალტიკ დეველოპმენტის" წარმომადგენლებთან, საშიშროება არის ქვათა ცვენიდან, მათ მიეცათ რეკომენდაცია  და ქვათა ცვენის საწინააღმდეგოდ დამატებით ღონისძიებებს გაატარებენ, ასევე მათთან მოლაპარაკებების გზით გადაწყდა რომ ჰიდროლოგიური ნაწილი გასაუმჯობესებელია, აღნიშნულ ხევში ისინი მოწყობილ წყალგამტარს ამაღლებენ მეტრა ნახევარი, როგორც ეს ნარჩევი კვლევაში",- განაცხადა მაია ბითაძემ.