A და B კატეგორიებად დაყოფის მიზნით ტაქსის მძღოლები იუსტიციის სახლის სერვისით დღეიდან ისარგებლებენ

A და B კატეგორიებად დაყოფის მიზნით ტაქსის მძღოლები იუსტიციის სახლის სერვისით დღეიდან ისარგებლებენ. ამის შესახებ დღეს  მთავრობის სხდომაზე  თბილისის მერმა განაცხადა. 

კახა კალაძის თქმით, ტაქსების რეფორმა სატრანსპორტო პოლიტიკის ერთ-ერთი მიმართულებაა, რაზეც მას არაერთხელ უსაუბრია. 

„იცით, ტაქსების A და B კატეგორიებად დაყოფის პროცესი დაწყებულია. ლიცენზიის მქონე ტაქსების მძღოლებს ეს დაყოფა შეუძლიათ განახორციელონ სახლიდან გაუსვლელად, ინტერნეტით. თუმცა, იმისთვის, რომ ეს პროცესი უფრო მოსახერხებელი იყოს, ჩვენ გვქონდა კომუნიკაცია იუსტიციის სახლთან და ამისთვის მე მინდა, კიდევ ერთხელ იუსტიციის მინისტრს მადლობა გადავუხადო. დღეიდან ტაქსის მძღოლებს ექნებათ საშუალება იუსტიციის სახლშიც ისარგებლონ აღნიშნული სერვისით და ტაქსები A და B კატეგორიებად დაიყოს“, - განაცხადა დედაქალაქის მერმა.

ამასთან, კახა კალაძემ კიდევ ერთხელ შეახსენა, რომ ვაუჩერების გაცემა 10 აგვისტოს დასრულდება. „ვაუჩერების გაცემა დასრულდება 10 აგვისტოს. ვაუჩერების განაღდების საბოლოო თარიღი კი მიმდინარე წლის პირველი ოქტომბერია. ანუ, ის ვაუჩერები, რომელსაც ჩვენ გავცემთ: ფირის გადაკვრის, გადაღებვის, ქიმწმენდის, 1-ელ ოქტომბრამდე უნდა განაღდდეს, რადგან პირველი ოქტომბრიდნ ძალაში შედის რეფორმის პირველი ეტაპი. თავად ბენეფიტებს რაც შეეხება, კიდევ ერთხელ მინდა გავიმეორო: A  კატეგორიის მძღოლებს ექნებათ შესაძლებლობა, დედაქალაქის სხვადასხვა ქუჩებსა და უბნებში ყოველგვარი გადასახადის გარეშე ისარგებლონ უფასო პარკინგით. ამ მიზნით მათთვის სპეციალური ადგილებია გამოყოფილი და დამატებით კიდევ დაემატება ახალი ადგილები. გარდა ამისა, თუ მათ ჰყავთ თეთრი ავტომობილი,  შეუძლიათ თავიანთ ავტომობილებზე სარეკლამო ბანერები გააკრან და ამით დამატებით შემოსავალი მიიღონ. მათთვის ასევე უფასოა ქიმწმენდის, გადაღებვისა და გადაკვრის ვაუჩერები და ისინი ყოველგვარი ანაზღაურების გარეშე გადაეცემათ ტაქსის მძღოლებს“, - განაცხადა კახა  კალაძემ. მისივე თქმით, მათთვის მთავარია, ტაქსები იყოს მოწესრიგებული და სუფთა. 

დედაქალაქის მერმა ასევე განმარტა, რომ ტაქსის მძღოლები საშემოსავლო გადასახადისგან გათავისუფლებული არიან. მისივე თქმით, აქტიურად მიმდინარეობს მუშობა ბანკებთან და ამ მიზნით რამდენიმე საბანკო პროდუქტი უკვე მომზადებულია.