ირაკლი კოვზანაძე ეროვნულ ბანკს ბიზნესთან და მოსახლეობასთან მეტი კომუნიკაციისკენ მოუწოდებს

პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძე ეროვნულ ბანკს ბიზნესსა და მოსახლეობასთან მეტი კომუნიკაციისა და „ვერბალური ინტერვენციებისკენ“ მოუწოდებს. ამის შესახებ კოვზანაძემ ჟურნალისტებთან პარლამენტში განაცხადა. ინფორმაციას პარლამენტის პრესსამსახური ავრცელებს. 

ირაკლი კოვზანაძის განცხადებით, საქართველოს საგადასახდელო ბალანსსა და ლარის კურსზე საგარეო შოკი ნეგატიურად აისახა. მისი თქმით, სავაჭრო დეფიციტი საქართველოს ეკონომიკის მემკვიდრეობითი პრობლემაა, რომელიც, თავის მხრივ, საგადასახდელო ბალანსის დეფიციტის გენერირებას ახდენს. აღნიშნული დეფიციტი ტურიზმიდან და უცხოეთში მყოფი თანამემამულეებისგან გადმორიცხული ფულადი გზავნილებით (რემიტენსებით) ბალანსდება. 

„გასულ წელს ტურიზმიდან მიღებულმა შემოსავლებმა 3.2 მილიარდ დოლარს გადააჭარბა, საიდანაც 650 მილიონი ევრო - რუს ტურისტებზე მოდიოდა. საავიაციო ემბარგოს დაწესება და რუსეთიდან ტურისტების ნაკადის მკვეთრი შემცირება საქართველოს ეკონომიკაზე ნეგატიურად აისახა. უფრო მეტიც, როგორც ჩემთვის ცნობილია, ტურისტების რიცხვი არა მხოლოდ რუსეთიდან, არამედ დსთ-ის სხვა ქვეყნებიდანაც შემცირდა“, - აღნიშნა ირაკლი კოვზანაძემ. 

მისი თქმით,  თვის ბოლოსთვის ასევე დამახასიათებელია კონტრაგენტების მიერ უცხოური ვალუტის შესყიდვები საკუთარი ვალდებულებების დასაფარად, რამაც, ასევე შესაძლოა, გაზარდა უცხოურ ვალუტაზე მოთხოვნა. 

„ჩვენ გვაქვს მცურავი სავალუტო კურსი, რომელიც ასრულებს ამორტიზატორის ფუნქციას და შთანთქავს საგარეო შოკებისგან გამოწვეულ შედეგებს. თუ ლარის გაუფასურება ინფლაციაზე აისახება,  ეროვნული ბანკი ვალდებულია, ჩაერიოს და მას აქვს ინსტრუმენტები ინფლაციის დასათრგუნად, მათ შორის, მონეტარული პოლიტიკის განაკვეთის აწევის, სავალუტო ინტერვენციებისა თუ სხვა ღონისძიებების მეშვეობით. ის დამოუკიდებელი სტრუქტურაა, რომლის დამოუკიდებლობა გარანტირებულია კონსტიტუციით, შესაბამისად, ამ ღონისძიებებს გამოიყენებს მაშინ, როცა საჭიროდ ჩათვლის. საქართველოს მონეტარულ ხელისუფლებას, ეროვნულ ბანკს აქვს ყველა ბერკეტი, რათა უზრუნველყოს ფინანსური სტაბილურობა“, - აღნიშნა ირაკლი კოვზანაძემ.

ეკონომიკის დარგში სპეციალისტი აკაკი ცომაია ამბობს, რომ ეროვნული ვალუტის კურსი სავარაუდოდ ვერ გამყარდება, რადგან პირდაპირი უცხოური ინვესტიციები მცირდება. მისი შეფასებით, საინვესტიციო გარემო მკვეთრად უარესდება იქედან გამომდინარე, რა პროცესებიც მიმდინარეობს, არა მხოლოდ "თიბისი ბანკის" არამედ ზოგადად სახელმწიფო ინსტიტუციების ჩამოშლის კუთხით, რაც ცომაიას თქმით, თავის მხრივ ლარის კურსზეც აისახება.

საქართველოს ეროვნულმა ბანკმა ლარის ოფიციალური გაცვლითი კურსი დაადგინა. 31 ივლისს 1 აშშ დოლარის ოფიციალური ღირებულება 2.9507 ლარი იქნება, 1 ევრო კი 3.2889 ეღირება.

პირველად ლარის ისტორიაში, კომერციულ ბანკებში დადგენილი გაცვლითი კურსით 1 დოლარი 3 ლარი ღირს. ჯამში, დღეს ეროვნული ვალუტა დოლართან და ევროსთან მიმართებით 2 თეთრით გაუფასურდა.

კითხვაზე, აპირებს თუ არა დღევანდელი მდგომარეობის გათვალისწინებით ეროვნული ბანკი ჩარევას, ეროვნული ბანკის პრეზიდენტი პასუხობს:

„ჩვენ ვფიქრობთ, რომ დღეს ნომინალური ეფექტური გაცვლითი კურსი არის იმაზე უფრო გაუფასურებული, ვიდრე იმ საგარეო შოკის ზომაა, რომელიც გვაქვს. იმ შემთხვევაში, თუ მოვლენების ასეთი განვითარება გადაეცემა ინფლაციას, მაშინ მივიღებთ ზომას. მაგრამ ის, რომ ეფექტური გაცვლითი კურსი უფრო მეტად არის გაუფასურებული, შეიძლება იმას მიანიშნებდეს, რომ ეს პროცესი დიდხანს არ გაგრძელდება“.

ეროვნულმა ვალუტამ გაუფასურება 25 ივნისიდან დაიწყო, როცა ლარი დოლართან და ევროსთან 4 თეთრით გაუფასურდა.