კვლევა: აზიაში ქართული ღვინის ექსპორტით რუსეთიდან მიღებულ შემოსავლებს გადავაჭარბებთ

„გალტ & თაგარტმა“ ღვინისა და სპირტიანი სასმელების ინდუსტრიის კვლევის პრეზენტაცია გამართა, სადაც ღვინისა და სპირტიანი სასმელების სექტორში არსებული ვითარება და ადგილობრივი და საექსპორტო ბაზრების განვითარების პოტენციალი განიხილა. 

კვლევის მიხედვით, 2019 წელს მოსალოდნელია სექტორის დაახლოებით 10%-იანი წლიური ზრდა, რაც 2018 წელს ყურძნის რეკორდული მოსავლიდან და ექსპორტის ზრდის ტენდენციებიდან გამომდინარეობს. ასევე, 2013-2018 წლებში ღვინის ექსპორტი არატრადიციულ ბაზრებზე გასამმაგდა, რაც საკმაოდ კარგი მიღწევაა იმ პირობებში, რომ ამ ბაზრებზე ქართულ ღვინოს ნაკლებად იცნობენ. 

კვლევის თანახმად, აზიაში ღვინის მოხმარება საკმაოდ მზარდია და ამ ბაზრების მიმართულებით მომდევნო 5 წელიწადში ქართული ღვინის ექსპორტის 120 მლნ აშშ დოლარამდე ზრდა შესაძლებელია, რაც რუსეთიდან მიღებულ ამჟამინდელ შემოსავლებს გადააჭარბებს. როგორც საინვესტიციო კომპანია აცხადებს, საქართველოში ამის მისაღწევად საჭიროა ბრენდის პოპულარიზაციასა და სადისტრიბუციო ქსელების გაფართოებაზე კონცენტრირება.  

„გალტ & თაგარტის“ მიერ აღნიშნული სექტორის წარმომადგენლების გამოკითხვის შედეგად შემდეგი გამოწვევები გამოვლინდა: თანამშრომლობის პლატფორმის არარსებობა, ერთიანი სტრატეგიის არქონა საექსპორტო ბაზრებთან მიმართებაში და სუსტი კორპორატიული მმართველობა. ასევე, შემაფერხებელ ფაქტორებად კვლევაში სახელდება დაბალტექნოლოგიური საწარმოო მეთოდების გამოყენება, ყურძნის წარმოების მაღალი თვითღირებულება, დაბალი მოსავლიანობა, ფასის და ხარისხის არათანმიმდევრულობა და ფრაგმენტული საწარმოო პროცესები.

ღონისძიებას ესწრებოდნენ დარგის სპეციალისტები, ქართველი და უცხოელი ექსპერტები, საქართველოს ბანკის კორპორატიული კლიენტები, მცირე და საშულო ბიზნესის წარმომადგენლები და სხვა მოწვეული სტუმრები.

სულ ცოტა ხნის წინ ბრიტანულმა გამოცემა The Independenet-მა ცხრა საუკეთესო ევროპული ღვინის სია გამოაქვეყნა, სადაც ისეთ ქვეყნებთან ერთად, როგორებიცაა თურქეთი, უკრაინა, მოლდოვა, შვეიცარია და მაკედონია, ორი ქართული ღვინო მოხვდა - „ოროველას“ საფერავი 2008 და „იბერიულის“ ქისი 2017.