მაია ცქიტიშვილმა ლარის კურსის ცვლილების რამდენიმე ფაქტორი დაასახელა

ტელეკომპანია „იმედის“ გადაცემაში „ქრონიკა“ რეგიონული განვითარებისა და ინფრასტრუქტურის მინისტრმა, ვიცეპრემიერმა მაია ცქიტიშვილმა ლარის კურსის ცვლილების რამდენიმე ფაქტორი დაასახელა.

მისი თქმით, „ეს არის ზოგ შემთხვევაში საგარეო ფაქტორები, ეს არის ქვეყნის ეკონომიკის მდგომარეობა და, რა თქმა უნდა, ქვეყნის შიდა პოლიტიკური სტაბილურობა“. 

„როდესაც ლარის კურსზე ვსაუბრობთ, ისიც უნდა ავხსნათ, თუ რა იწვევს ლარის კურსის ცვლილებას. ლარის კურსის ცვლილებისას, ჩემი კოლეგებიც და ეროვნული ბანკიც მუდმივად აღნიშნავენ, რომ ჩვენ გვაქვს თავისუფალი გაცვლითი კურსი, რომელზედაც გავლენას ახდენს რამდენიმე ფაქტორი. ეს არის ზოგ შემთხვევაში საგარეო ფაქტორები, ეს არის ქვეყნის ეკონომიკის მდგომარეობა და, რა თქმა უნდა, ქვეყნის შიდა პოლიტიკური სტაბილურობა“, - განაცხადა ცქიტიშვილმა. 

„როცა ვსაუბრობთ საგარეო ფაქტორზე, გახსოვთ ალბათ ყირიმის ანექსია, თურქეთში განვითრებული პროცესები, ჩვენ სავაჭრო პარტნიორებთან მიმდინარე მოვლენები როგორ ახდენდა ლარის კურსზე გავლენას. რაც შეეხება ქვეყნის ეკონომიკურ მდგომარეობას, ბოლო 6 თვის მონაცემებით-გვაქვს 5% -იანი ეკონომიკური ზრდა და 11,5,%-ით გაზრდილი ექსპორტი, გვაქვს კარგი სავალუტო რეზერვები ანუ ყველა შიდა ეკონომიკური მაჩვენებელი, რომელიც აისახება ლარის კურსზე, არის ჯანსაღი. მესამე ფაქტორი შიდაპოლიტიკური სტაბილურობაა და ესეც ცხადია, პირველ რიგში, ხელისუფლების პასუხისმგებლობაა და ხელისუფლება ინარჩუნებს ამ სტაბილურობას, მაგრამ როდესაც ქვეყანაში ასეთი რადიკალური პროცესები ვითარდება, ამ პროცესების ასეთი სახით წარმართვაზე პასუხისმგებლობა ნამდვილად აქვს ოპოზიციას“, - აღნიშნა ვიცეპრემიერმა. 

მისივე თქმით, როდესაც ქვეყანაში ხდება რადიკალური პოლიტიკური პროცესების მთელი სერია, ძალიან მარტივია, ვნახოთ როგორ რეაგირებდა სავალუტო კურსი თითოეულ ფაქტზე, როგორი შედეგი ჰქონდა მოლოდინებს, სანქციების განხილვას და საბოლოოდ ამ სანქციების შემოღების შედეგად ტურიზმისგან შემოსავლების კლებას, რაც რა თქმა უნდა, აისახა ეროვნულ ვალუტაზე.

„შესაბამისად, ამ ნაწილში უკვე ოპოზიციას ეკისრება თავისი წილი პასუხისმგებლობა. რაც შეეხება მთავრობას, ჩვენ ვცდილობთ ყველანაირად დავაკომპენსიროთ ის უარყოფითი ეფექტი, რომელიც სამწუხაროდ მივიღეთ“, - განაცხადა მინისტრმა.

2 აგვისტოს ვაჭრობის შედეგად აშშ დოლარი გაუფასურდა და 2.8870 ლარი შეადგინა. 2019 წლის 1 აგვისტოს გამართულ საქართველოს ეროვნული ბანკის სავალუტო აუქციონზე სებ-მა გასაყიდად 40 მლნ. აშშ დოლარი გამოიტანა. აუქციონზე გაიყიდა 32 800 000 აშშ დოლარი, ხოლო საშუალო შეწონილმა გაცვლითმა კურსმა 2.9283 შეადგინა.

30 ივლისს, ისტორიაში პირველად, კომერციულ ბანკებში 1 დოლარის ფასი 3 ლარი გახდა. ამ ფონზე ბიზნესის წარმომადგენლებმა ეროვნული ბანკის პრეზიდენტი გააკრიტიკეს. 

რა არ უნდა გააკეთოთ ვალუტის კურსის ძლიერი რყევებისას ვრცლად წაიკითხეთ ამ ბმულზე.