ეროვნული ბანკი ახალი ოფისის მშენებლობას კადრების და ფუნქციების ზრდით ამართლებს

საქართველოს ეროვნული ბანკის (სებ) ინფორმაციით, ბანკის ახალი ოფისის მშენებლობა საკადრო პოლიტიკას უკავშირდება. ეროვნული ბანკი კადრების ზრდას გეგმავს, ფართოვდება უწყების ფუნქციები და შესაბამისად, სათაო ოფისი ახალ მოთხოვნებს ვერ უპასუხებს, ამის შესახებ „ინტერპრესნიუსი“ წერს.  

„ბოლო ორი წლის განმავლობაში მნიშვნელოვნად გაიზარდა საქართველოს ეროვნული ბანკის ფუნქციები, რაც საჭიროებს შესაბამის საკადრო რესურსს. ამასთან, გასათვალისწინებელია, რომ ფინანსური სექტორი ვითარდება და ზრდის დინამიკა მომავალშიც გაგრძელდება, რაც ეროვნული ბანკისგან დამატებით რესურსებს მოითხოვს. არსებული საოფისე ფართი ვერ პასუხობს ვერც მიმდინარე და ვერც სამომავლო მოთხოვნებს. შესაბამისად, ეროვნული ბანკის საოფისე ფართის საკითხი მოითხოვს გადაწყვეტას გრძელვადიანი პერსპექტივის თვალსაზრისით.

პროექტის განხორციელებას, სავარაუდოდ, 3-4 წელი დასჭირდება და, მიმდინარე გათვლებით, მოემსახურება პრობლემის რამდენიმე ათეული წლით მოგვარებას. მშენებლობის ძირითადი ნაწილი, შესაძლებელია, არსებული საოფისე ფართის რეალიზაციით დაიფაროს. მთლიანობაში კი, ეს არის ინვესტიცია, რომელიც ქვეყანას მრავალი წლის განმავლობაში მოემსახურება“, - აცხადებენ საქართველოს ეროვნულ ბანკში.

ამასთან, როგორც სებ-ში განმარტავენ, რა დანიშნულებით მოხდება იუსტიციის სახლის შენობის იმ ფლიგელის გამოყენება, სადაც ამჟამად სებ-ის სათავო ოფისია განთავსებული, ჯერჯერობით გადაწყვეტილი არ არის.

„ამ ეტაპზე ეს უცნობია და გადაწყვეტილება არ არის მიღებული. შესაძლებელია, მოხდეს ოფისის რეალიზაცია ან მთავრობისთვის გადაცემა“,-აცხადებენ საქართველოს ეროვნულ ბანკში.

რაც შეეხება საკითხს, თუ რის საფუძველზე განისაზღვრა, რომ სებ-ის ახალი სათავო ოფისის მშენებლობისთვის სავარაუდოდ, 50 მილიონი ლარია საჭირო, როგორც ეროვნულ ბანკში აცხადებენ, ინფორმაცია პროექტის ღირებულების შესახებ ტენდერის/კონკურსის დასრულების შემდეგ გახდება ცნობილი.

სებ-ის მიერ გამოქვეყნებული ტექნიკური დავალების თანახმად, ეროვნული ბანკის ახალი სათაო ოფისის მშენებლობის სავარაუდო ბიუჯეტი 50 მილიონ ლარს შეადგენს. A კლასის ახალი სათაო ოფისის შენობის სამშენებლო ფართი კი დაახლოებით 17 000 მ2-ია.