მსოფლიოში უძველესმა ტურისტულმა კომპანიამ იძულებითი ლიკვიდაცია გამოაცხადა

მსოფლიოში უძველესმა ბრიტანულმა ტურისტულმა კომპანიამ Thomas Cook-მა იძულებითი ლიკვიდაციის შესახებ განაცხადა და სამშობლოში საკუთარი ბრიტანელი კლიენტების დაბრუნებას ელოდება. ინფორმაციას ამის შესახებ BBC ავრცელებს.

ეს შესაძლოა ქვეყნის ისტორიაში მშვიდობიან დროს განხორციელებული ყველაზე მსხვილი ევაკუაცია გახდეს, რომელიც ბიუჯეტს 600 მილიონი გირვანქა დაუჯდება. 

​ბოლო დღეებში კომპანია, რომელსაც კრედიტების გასტუმრების პრობლემები შეექმნა, ვალების რესტრუქტურიზაციაზე მოლაპარაკებებს კრედიტორებთან და მთავარ აქციონერთან - Fosun Tourism Group-თან აწარმოებდა, თუმცა მოლაპარაკებები უშედეგოდ დასრულდა. კრედიტორებმა კომპანიას 900 მილიონი გირვანქა გამოუყვეს, თუმცა Thomas Cook-ი კიდევ 200 მილიონს საჭიროებს.

„მიუხედავად ჩვენი მცდელობებისა, მოლაპარაკებების შედეგად კომპანიის აქციონერებმა და ახალმა კრედიტორებმა შეთანხმებას ვერ მიაღწიეს. კომპანიას იძულებითი ლიკვიდაციის გამოცხადების გარდა სხვა გამოსავალი არ დარჩა“, - ნათქვამია Thomas Cook-ის განცხადებაში,

ამჟამად მსოფლიოს სხვადასხვა ქვეყნებში Thomas Cook-ის 600 ათასამდე კლიენტი იმყოფება, მათგან 160 ათასი დიდი ბრიტანეთის მოქალაქეა. ქვეყნის მთავრობამ უკვე განაცხადა, რომ პრობლემის მოსაგვარებლად სპეციალურ სამუშაო ჯგუფს შექმნის.მსოფლიოში პირველი ტურისტული კომპანია Thomas Cook AG 1841 წელს დაარსდა და ორგანიზებული ტურიზმის გამომგონებლის ტომას კუკის სახელს ატარებს.

22 სექტემბერს ტუნისის ერთ-ერთი სასტუმროს თანამშრომლებმა ტურისტები მძევლად აიყვანეს და უკვე ნაყიდი ტურების საფასურის კიდევ ერთხელ გადახდა მოითხოვეს. სასტუმრო Les Orangers-ის პერსონალი შიშობს, რომ კომპანია Thomas Cook-ი, რომელიც ახლა ფინანსური სირთულეების წინაშე აღმოჩნდა, მათ ხელფასს ვერ გადაუხდის.