კობა გვენეტაძე: „პროგრეს ბანკი“ აღარ არსებობს, ამიტომ მისი შემოწმება შეუძლებელია

საქართველოს ეროვნული ბანკის პრეზიდენტის, კობა გვენეტაძის განცხადებით, „პროგრეს ბანკი“ დღესდღეობით აღარ არსებობს, ამიტომ მისი შემოწმება შეუძლებელია. ასე უპასუხა გვენეტაძემ „თიბისი ბანკისა“ და მოძრაობა „ლელოს“ დამფუძნებელს მამუკა ხაზარაძეს. 

მამუკა ხაზარაძემ კობა გვენეტაძეს „პროგრეს ბანკის“ ტრანზაქციებით დაინტერესებისკენ მოუწოდა.

კობა გვენეტაძის განცხადებით, არ არის სწორი ინფორმაცია, თითქოს, ეროვნულმა ბანკმა ყველა ტრანზაქციის შესახებ იცის:

„თითოეული ტრანზაქციის კონტროლი თავად ბანკის მოვალეობაა. ეროვნული ბანკი იმ პოლიტიკასა და პროცედურებს ამოწმებს, რომელიც კომერციულ ბანკებს აქვთ. შერჩევითი მეთოდით აკონტროლებს იდენტიფიცირებულ ოპერაციებს, რათა დარწმუნდეს, ბანკი პროცედურებს სწორად ახორციელებს. თუ ეროვნული ბანკი დაინახავს, რომ ამ პროცესში „ფულის გათეთრების“, სისხლის სამართლის დანაშაულის შესაძლო ნიშნები დაფიქსირდ , შესაბამის საგამოძიებო ორგანოებს აცნობებს. „პროგრეს ბანკი“ დღესდღეობით აღარ არსებობს, ამიტომ შეუძლებელია მისი შემოწმება. ეროვნულ ბანკში არ მუშაობენ გამომძიებლები, პროკურორები, აქ მუშაობენ მაკროეკონომისტები,ზედამხედველები. ეროვნული ბანკის ფუნქცია არ არის „ფულის გათეთრების“ ან რაიმე სხვა ფაქტის, როგორც დანაშაულის აღმოჩენა ან გამოძიება“, - განაცხადა ეროვნული ბანკის პრეზიდენტმა. 

„მთავარ არხმა“ ჟურნალისტური გამოძიება ჩაატარა, რომლის თანახმად, „პროგრეს ბანკში“ აუდიტორული შემოწმება უცხოელმა ექსპერტებმა 2016 წელს ჩაატარეს. შემოწმების დროს სპეციალისტებმა დაადგინეს, რომ ბანკის ათობით გადარიცხვა ფულის გათეთრების ნიშნებს შეიცავდა. მათ შორის, მედიასაშუალება მიუთითებს, რომ არის „ბი ემ ჯი ჰოლდინგის“ მიერ გაკეთებული გადარიცხვაც, რომელსაც საქართველოში „ბი ემ ჯი ჯორჯია“ ეკუთვნის. 

ტელეკომპანიის ინფორმაციით, „პროგრეს ბანკში“ 22% ბიძინა ივანიშვილს ეკუთვნოდა, 78% კი პანამაში რეგისტრირებულ კომპანიას, რომლის უკანაც რუსეთში ფულის გათეთრებაში ეჭვმიტანილი ილია გავრილოვი იდგა. „პროგრეს ბანკი“ 2007 წელს კახა კალაძემ დააფუძნა, 9-წლიანი არსებობის განმავლობაში ბანკმა 8 წელი წაგებით დაასრულა და ჯამში 5 მილიონ ოთხასი ათასი ლარი იზარალა. 2013 წელს კახა კალაძემ ბანკის საკონტროლო პაკეტი 78% ოფშორში რეგისტრირებულ კომპანიას გადასცა, რომლის უკანაც ილია გავრილოვი იდგა. ამავე დროს, ბანკის 22%-ის მფლობელი ბიძინა ივანიშვილი გახდა. 2016 წელს „პროგრეს ბანკის“ აქციების ნაწილი მამუკა ხაზარაძემ „ბანკ რესპუბლიკასთან“ ერთად იყიდა.

მამუკა ხაზარაძე „პროგრეს ბანკთან“ დაკავშირებით ბიძინა ივანიშვილის პროკურატურაში დაბარებას ელოდება.

საქართველოს ეროვნულმა ბანკმა „პროგრეს ბანკს“ საბანკო საქმიანობის ლიცენზია 2016 წლის 18 ოქტომბერს გაუუქმა.