BBC-მ საქართველოში ბიტკოინის ბუმის შესახებ სიუჟეტი მოამზადა

BBC-ის ჟურნალისტმა ედ ბატლერმა საქართველოში კრიპტოვალუტის მაინინგთან დაკავშირებით სიუჟეტი მოამზადა. ის საქართველოშიც იყო ჩამოსული და დაათვალიერა კრიპტოვალუტის მწარმოებელი ქარხნები, ასევე გაესაუბრა ეკონომიკის მინისტრს ნათია თურნავას და „გრინ ენერჯის“ წარმომადგენელს დავით ჭიპაშვილს.

ეკონომიკის მინისტრმა ნათია თურნავამ BBC-ის ჟურნალისტთან ინტერვიუს დროს ქვეყნის პოტენციალზე გაამახვილა ყურადღება, რომელიც საქართველოს ელექტროენერგიის ექსპორტის კუთხით აქვს. მინისტრმა ელექტროენერგიის სფეროში განხორციელებულ და დაგეგმილ რეფორმებზეც ილაპარაკა და ხაზი გაუსვა განახლებადი ენერგიის საკითხებსაც. თურნავას თქმით, ქვეყანას ამბიციური გეგმა აქვს რომ შავი ზღვის საქართველოს სანაპირო ზღვის ევროპული ქვეყნების სანაპიროს წყალქვეშა მაღალი-ძაბვის ელექტროობის კაბელებით დაუკავშირდეს.

ედ ბატლერის თქმით, საქართველო კრიპტოვალუტის მაინინგით მსოფლიოში ჩინეთისა და ვენესუელის შემდეგ მესამე ადგილზეა. ის BitFury-ის ქარხანაშიც იყო მისული, სადაც წარმომადგენელს ჰკითხა რა ოდენობის ბიტკოინს გამოიმუშავებენ, თუმცა განაცხადეს, რომ ეს საჯარო ინფორმაცია არაა. ჟურნალისტს არც ფოტოების გადაღების უფლება მისცეს. როგორც ედ ბატლერი ამბობს, მართალია ადგილზე არ უთხრეს რა ოდენობით ბიტკოინს აწარმოებენ, თუმცა ოფიციალური მონაცემებით BitFury-ის წლიური შემოსავალი ნახევარ მილიარდ დოლარამდეა.

BBC-ის ჟურნალისტის თქმით, მასთან ინტერვიუში „გრინ ენერჯის“ წარმომადგენელმა დავით ჭიპაშვილმა თქვა, რომ ბიტკოინის წარმოება ქვეყნის ელექტროენერგიას „ანიავებს“, რაშიც ჟურნალისტი ეთანხმება:

„BFDC Georgia [BitFury] მოიხმარს 389,7 მლნ კვტ/სთ-ს. ეს არის მთელი ქვეყნის მოხმარების 4%. თუ თქვენ ძალიან მარტივ კითხვას დაუსვამთ სამინისტროებს, თუ რომელი სექტორი მოიხმარს [ენერგიას] საქართველოს არ აქვს ამგვარი ანალიზი. რეალურად ჩვენ არ გვაქვს და არ ვიცით რამდენი ბიტკოინმაინერი გვყავს... ვფიქრობ, რომ მაინინგზე ჯამში, [ელექტროენერგიის] მთლიანი მოხმარების 10%-ზე მეტი იხარჯება. რაც ყველაზე მთავარია, ისინი მოიხმარენ გაცილებით მეტ ენერგიას, ვიდრე დიდი ინდუსტრიები“, - განაცხადა დავით ჭიპაშვილმა ინტერვიუში. 

ედ ბატლერი თბილისში BitFury-ის ლატვიელ ხელმძღვანელს ვალერი ვავილოვსაც შეხვდა, რომელსაც კრიპტოვალუტის მაინინგის ბიზნესში ბიძინა ივანიშვილის ჩართულობაზე ჰკითხა, რაზეც ვავილოვმა უპასუხა, რომ საქართველოს ყოფილ პრემიერმინისტრს წილი არ აქვს. თუმცა, როგორც ედ ბატლერი ამბობს, ოფიციალური საჯარო ჩანაწერების მიხედვით, „საქართველოს ყოფილ პრემიერმინისტრს და უმდიდრეს კაცს, ბატონ ივანიშვილს შესაძლოა არ ჰქონდეს პირდაპირი წილი BitFury-ში. მასთან დაკავშირებულმა თანაინვესტირების ფონდმა 10 მილიონი დოლარი ჩადო 2014 წელს წარმოების დასაწყებად“, - ამბობს BBC-ის ჟურნალისტი ედ ბატლერი.

ის ასევე გაესაუბრა ეკონომისტ გოჩა თუთბერიძეს, რომლისთვისაც საინტერესოა თუ რატომ ოპერირებს მაინერკომპანია თავისუფალი ვაჭრობის ზონაში, რაც ნიშნავს, რომ მოხმარებული ელექტროენერგიის გადასახადს არ იხდის. ის ეჭვობს რომ ამის მიზეზი გარკვეული მთავრობის ეკონომიკური და ფინანსური ინტერესია.