თამბაქოს კონტროლის ალიანსი აპროტესტებს კანონპროექტს, რომლის მიხედვითაც თამბაქო 15 გრამიან პაკეტებში უნდა შეიფუთოს

არასამთავრობო ორგანიზაცია „თამბაქოს კონტროლის ალიანსი“ საპარლამენტო კომიტეტებზე „თამბაქოს კონტროლის შესახებ“ საქართველოს კანონში შესატანი ცვლილებების განხილვას აპროტესტებს. ალიანსის განცხადებით, საპარლამენტო კომიტეტებმა სამწუხარო და სამარცხვინო გადაწყვეტილება მიიღეს. ცვლილებათა პროექტის მიხედვით, კანონის უკვე მოქმედ ნორმას, რომელიც თამბაქოს ნაწარმის 50 და 100 გრამიან შეფუთვებით რეალიზებას გულისხმობს, 15 გრამიანი შეფუთვაც დაემატება.

„ეს საკანონმდებლო ცვლილება იაფ თამბაქოს გააჩენს და შესაბამისად მასზე ხელმისაწვდომობას გაზრდის. ეს კი მნიშვნელოვნად გააუარესებს მოზარდებში მწეველობის ისედაც მაღალ მაჩვენებლებს და ბავშვებში მწეველობის პრობლემის აღმოფხვრის მცდელობას ხელს შეუშლის. ამასთან, გაიზრდება ზოგადად მწეველთა რაოდენობა და მოსალოდნელია გაჩნდეს ახალი, ე.წ. იაფი თამბაქოს მომხმარებელთა სეგმენტი. ჩამოთვლილი და სხვა მიზეზების გამო, რომლებიც საქართველოში თამბაქოს კონტროლის პოლიტიკას ეწინააღმდეგება, რამდენიმე თვეში აუცილებელი გახდება თუთუნის 15 გრამიანი შეფუთვის მცნების კანონიდან ამოღება. ისევე, როგორც აუცილებელი გახდა ფილტრიანი და უფილტრო თამბაქოს ნაწარმის თანაბარი დაბეგვრა.

თავის დროზე ამ მიმართულებით დატოვებულმა ხვრელებმა და ცვლილების მიღების გაჭიანურებამ უამრავი პრობლემა შექმნა. ამიტომაც გაუგებარია პარლამენტში სასესიო განხილვებისთვის ახალი, აბსურდული მოტივაციის მქონე საკანონმდებლო ცვლილების მხარდაჭერა. რატომ უნდა მივიღოთ ეს ცვლილება თამბაქოს კონტროლის კანონში, იმისთვის, რომ მის მორიგ აკრძალვამდე, დროებით ვიღაცამ ფული იშოვნოს? საზოგადოების სასიცოცხლო მნიშვნელობის გარდა პროექტი ეწინააღმდეგება ევროდირექტივას, რომლის თანახმად, გასახვევი თამბაქოს შეფუთვის მინიმალური რაოდენობა 30 გრამზე ნაკლები არ უნდა იყოს.

იმის გამო, რომ საქართველოში მწეველობის დონე მაღალია, მიუღებლად მიგვაჩნია გასახვევი თამბაქოს მინიმალური რაოდენობა 50 გრამზე დაბალი იყოს. კანონში სამარცხვინო ცვლილების ინიციატორები პარლამენტარები გოგა გულორდავა და გურამ მაჭარაშვილი არიან.

მათი ქმედება გვაიძულებს, ვიეჭვოთ, რომ კონკრეტული ბიზნეს ინტერესების, კერძოდ, თამბაქოს ინდუსტრიის ინტერესების გატარებას ცდილობენ და საკანონმდებლო ცვლილების სხვა მომხრეების მსგავსად არაფრად უღირთ, არამხოლოდ მოსახლეობის სასიცოცხლო ინტერესები. მათთვის უმნიშვნელოა საქართველოში თამბაქოს კონტროლის პოლიტიკა, რომ რაც შეიძლება ნაკლებმა ადამიანმა მოიხმაროს თამბაქოს ნაწარმი და არ გაიზარდოს მწეველთა რაოდენობა.

ამასთან, არ ანაღვლებთ, რომ თამბაქოს ინდუსტრიის ინტერესების შესაბამისი მათი საკანონმდებლო ინიციატივა საერთაშორისო კონვენციასა და ევროდირექტივას ეწინააღმდეგება. ვიმედოვნებთ, პარლამენტში უმრავლესობას ეყოფა გონიერება და აღნიშნულ პროექტს სასესიო განხილვებზე ხმას არ მისცემენ“, - ნათქვმია „თამბაქოს კონტროლის ალიანსის“ განცხადებაში.

2019 წლის 21 ნოემბრიდან დაუფასოებელი სახით ნებისმიერი თამბაქოს მიწოდება-რეალიზაცია აიკრძალა. მათ შორის თამბაქოს ნედლეულის, ჩიბუხის თამბაქოს, შესახვევი თამბაქოს, ასევე ჩილიმისათვის განკუთვნილი თამბაქოს რეალიზაცია და მიწოდება.

ამ ნაწარმის რეალიზაცია დასაშვებია მხოლოდ იმ შემთხვევაში, თუ დაფასოებულია ნეტო-მასით 50 ან 100-გრამიან პირველად შეფუთვაში. ამ წესით დაფასოებული თამბაქო უნდა იყოს აქციზური მარკით ნიშანდებული.