კობა გვენეტაძე: გაცვლითი კურსი კვლავ მცურავი იქნება

მონეტარულ და ფინანსურ პოლიტიკას მნიშვნელოვანი როლი აქვს ამ სიტუაციაში. მოგეხსებნებათ, რომ გარკვეული პერიოდის განმავლობაში ჩვენ ვაგროვებდით საერთაშორისო რეზერვებს, რადგანაც ჩვენი რეზერვები არ იყო ადექვატური და ამის გამო კრიტიკაც დავიმსახურეთ - ამის შესახებ საქართველოს ეროვნული ბანკის პრეზიდენტმა „ღია ეთერში“ განაცხადა.

კობა გვენეტაძის თქმით, დღევანდელი სიტუაცია უპრეცენდენტოა იქიდან გამომდინარე, რომ ამ ნაკადების შეჩერება ძალიან დიდია და ძალიან რთულია იმის თქმა, როდემდე გაგრძელდება ასე.

„ახლა ჩვენ გადავდივართ სხვა სტრატეგიაზე, რადგან გამოწვევა მიღებულია და ვცვლით იმ სტრატეგიას, რომლითაც ვმოქმედებდით. გაცვლითი კურსი კვლავ იქნება მცურავი. ჩვენ უფრო ხშირად გამოვჩნდებით ბაზარზე. საჭიროების მიხედვით გავყიდით აუქციონებზე სავალუტო რეზერვებს და ამავე დროს სხვა არხითაც ვაჭრობაზე გამოვჩნდებით, იმისათვის, რომ ლარის კურსის დიდი მერყეობა დავაბალანსოთ. ერთი რამ არ უნდა დაგვავიწყდეს, მაშინ როდესაც უმრავლესი ვალუტები მსოფლიოსა თუ ჩვენს რეგიონში უფასურდება, ეროვნულმა ბანკმა ეს კურსი რომ დაიცვას, ეს ნიშნავს, რომ ქვეყანა თავის კონკურენტუნარიანობას მთლიანად დაკარგავს და მისი პროდუქცია გასაღებადი დიდი ხნის განმავლობაში აღარ იქნება. აქედან გამომდინარე გარკვეული კორექცია აქაც უნდა მოხდეს, შეუძლებელია ამხელა შოკის გადატანა ისე, რომ რაღაც ცვლილება არ მოხდეს. იმიტომ, რომ ახლა ნორმალურად არ ფუნქციონირებს სავალუტო ბაზარი ჩვენ მივაწოდებთ საკმარის ლიკვიდობას როგორც დოლარში, ისე ლარში“ - განაცხადა კობა გვენეტაძემ.

მისი თქმით ერთი ნაწილია გაცვლითი კურსი, ხოლო მეორე ნაწილია ფასები, რისთვისაც მონეტარული პოლიტიკა ძალიან მნიშვნელოვანია.

„როდესაც მონეტარული პოლიტიკის კომიტეტის ბოლო სხდომა გვქონდა, საკმაოდ რთული გადასაწყვეტი იყო, რადგანაც ფაქტორები არის, რომელიც ორი მხრიდან მოქმედებენ ფასების საერთო დონეზე. ეს არის ფაქტორები, რომლებიც გვეუბნებიან, რომ თუ ერთ მხარეს წავიდა ინფლაცია გაცილებით მაღალი იქნება, ხოლო თუ მეორე მხარეს წავიდა, მაშინ ძალიან დაბალი. ჩვენ, რა თქმა უნდა, არ გვინდა რა მაღალი ინფლაცია და არც დაბალი. აქედან გამომდინარე, ჩვენ ვუყურებთ სიტუაციას და დარწმუნებული ვართ, რომ სწორი პოლიტიკის შედეგად, ინფლაცია დაახლებით წელიწადნახევარში ნელ-ნელა შემცირდება და ჩვენ მიზნობრივ მაჩვენებელს დავუახლოვდებით“ - განაცხადა კობა გვენეტაძემ.